Sý salasyna jańa serpin: Qazaqstan men Qytaı kadr daıarlaý isin kúsheıtedi
ASTANA. KAZINFORM — Qazaqstan men Qytaı sý resýrstaryn basqarý salasyndaǵy yntymaqtastyqty jańa deńgeıge kóterýdi kózdep otyr. Taraptar mamandar daıarlaý, birlesken bilim berý baǵdarlamalaryn iske qosý, sý ınfraqurylymy jobalaryna qytaılyq kompanııalardy tartý jáne transshekaralyq sý resýrstaryn bólý máselelerin talqylady. Bul týraly vedomstvonyń baspasóz qyzmeti málim etti.
Sý resýrstary jáne ırrıgatsııa mınıstri Nurjan Nurjigitov Qazaqstandaǵy Qytaı Halyq Respýblıkasynyń Tótenshe jáne ókiletti elshisi Han Chýnlınmen kezdesti. Taraptar sý salasyndaǵy ekijaqty yntymaqtastyqtyń ózekti máselelerin talqylady. Atap aıtqanda, kadr daıarlaý baǵytyndaǵy ózara is-qımyl máseleleri qaraldy.
Osy jyldyń qyrkúıek aıynda Qazaq ulttyq sý sharýashylyǵy jáne ırrıgatsııa ýnıversıteti Soltústik Qytaı sý resýrstary jáne gıdroenergetıka ýnıversıtetimen birlesken bilim baǵdarlamasyn iske qosýdy josparlap otyr. Sonymen qatar qazaqstandyq stýdentterge Qytaıdyń osy joǵary oqý ornynda bilim alý úshin granttar bólý máselesi boıynsha kelissózder júrgizilip jatyr. Budan bólek, Taraz qalasynda Qazaq sý sharýashylyǵy ǵylymı-zertteý ınstıtýtynyń bazasynda Qytaıdyń «Úsh shatqal» elektr energetıkasy kásiptik kolledjimen birlesken oqý ortalyǵyn ashý máselesi pysyqtalýda.
Eske salsaq, bıyl mamyr aıynda qazaqstandyq sý sharýashylyǵy salasy mamandarynyń alǵashqy toby Qytaıǵa sý resýrstaryn basqarý júıelerin josparlaý jáne iske asyrý tájirıbesimen, sondaı-aq sý nysandaryn keshendi saýyqtyrý tehnologııalarymen tanysýǵa arnalǵan semınarǵa attanǵan bolatyn.
Semınar «Qazsýshar» RMK men Power China International Group Limited kompanııasy arasyndaǵy ózara túsinistik jáne yntymaqtastyq týraly memorandým, sondaı-aq QR Sý resýrstary jáne ırrıgatsııa mınıstrligi men Qytaı Halyq Respýblıkasynyń Sý sharýashylyǵy mınıstrligi arasyndaǵy ózara túsinistik jáne yntymaqtastyq týraly memorandým aıasynda uıymdastyryldy. Barlyq shyǵyndy Qytaı tarapy óz moınyna aldy. Jalpy jyl sońyna deıin kórshi elde shamamen 200 qazaqstandyq maman bilim alady.
Kezdesýde Nurjan Nurjigitov Qytaı elshisimen qytaılyq kompanııalardyń Qazaqstan aýmaǵyndaǵy sý ınfraqurylymy jobalaryn iske asyrýǵa qatysý múmkindigin jáne transshekaralyq sý resýrstaryn bólý jónindegi kelissózderdiń barysyn da talqylady.
— Qazaqstan men Qytaıdy berik strategııalyq áriptestik baılanystyrady. Biz ózara yntymaqtastyǵymyzdy joǵary baǵalaımyz jáne búgingi kezdesý sý resýrstaryn tıimdi basqarý salasyndaǵy ekijaqty ózara is-qımyldy odan ári nyǵaıtýǵa serpin beretinine senimdimiz, — dedi QR Sý resýrstary jáne ırrıgatsııa mınıstri Nurjan Nurjigitov.
Aıta keteıik, buǵan deıin taǵy eki kolledj jańa oqý jylynan bastap sý salasyna maman daıarlaıtynyn jazdyq.
