Sý salasyna mamandanǵan JOO Taraz qalasynda qurylady

ASTANA. KAZINFORM –  Prezıdent keńesshisi Qanat Bozymbaev Nazarbaev ýnıversıtette ótip jatqan halyqaralyq forýmda sý salasyna mamandanǵan JOO Taraz qalasynda qurylatynyn aıtty.

Forýmnyń ashylýynda sóz sóılegen Qanat Bozymbaev eldegi bazalyq JOO-nyń biri sý salasyna mamandanatynyn aıtqan bolatyn.

BAQ ókilderi Prezıdent keńesshisinen áńgime qaı joǵary oqý orny týraly ekenin naqtylady.

«Taraz qalasynda Jambyl gıdromelıoratıvtik ınstıtýty boldy ǵoı, sony qazir tıisti mınıstrlikter qarap jatyr. Jańadan osyndaı sý salasyna ǵana mamandanǵan ýnıversıtet qurý kerek. Qazir osy máselelerdi qarap jatyrmyz. Sebebi bizde maman tapshylyǵy bar. Biz qazirdiń ózinde balalardy basqa memleketterge jiberip jatyrmyz. Bizde de mamandyqtar bar. Biraq mamandandyrylǵan bir ýnıversıtet nemese ınstıtýt bolý kerek», - dedi Qanat Bozymbaev.