Sý salasy tsıfrlandyrý: 23 myń nysan týraly derek bir bazaǵa biriktirildi
ASTANA. KAZINFORM — Sý salasyn tsıfrlandyrý Ulttyq sý resýrstarynyń aqparattyq júıesiniń aınalasynda qurylyp jatyr. Júıe sý nysandary, ınfraqurylym, sý paıdalanýshylar jáne jerasty sýlary týraly derekterdi bir bazaǵa biriktirip, salany tıimdi basqarýǵa múmkindik beredi. Bul týraly Sý resýrstary jáne ırrıgatsııa mınıstrligi málim etti.
— Júıede 17 748 ózen, 3 148 kól jáne 1 109 gıdrotehnıkalyq qurylysty qosa alǵanda, 23 myńnan astam sý obektileri boıynsha málimetter tsıfrlandyrylǵan. 3 myńǵa jýyq uıym jáne 4 myńnan astam paıdalanýshy tirkeldi, nysandardyń 9 myńǵa jýyq tsıfrlyq pasporty qalyptastyryldy. Júıe arqyly sý esebiniń bastapqy derekteri boıynsha 2,2 myńnan astam esep jáne 2-TP nysany boıynsha 1,3 myńnan astam esep qabyldandy, — delingen vedomstvonyń habarlamasynda.
«Qazsýshar» sharýalarmen jumysty ótinim berýden bastap tólem jasaýǵa deıin tolyq tsıfrlyq formatqa kóshirdi. 2026 jyldyń basynan beri bıllıng júıesi arqyly sý berý boıynsha 26,8 myńnan astam shart jasaldy.
Kelesi kezeń — iri ónerkásiptik jáne kommýnaldyq tutynýshylarmen jumysty tsıfrlandyrý jáne sý berýdi dálirek josparlaý úshin sýdy tutynýdy erte boljaýdy engizý.
BUU Damý baǵdarlamasymen (BUUDB) birlesip ózen aǵynyn, sý qoımalaryna keletin sý kólemin, sondaı-aq sý tasqyny men sý tapshylyǵy stsenarıılerin boljaıtyn nemistiń TALSIM-NG júıesi testileýden ótkizilýde. Búginde ol elimizdiń segiz iri ózen basseınin qamtıdy. Júıe jasandy ıntellekt jáne tsıfrlyq damý mınıstrliginiń Tasqyn baǵdarlamasymen biriktirilgen, onda derekter sý tasqyny táýekelderin baǵalaý jáne jedel sheshimder qabyldaý úshin paıdalanylady.
— Avtomattandyrý jumystary ırrıgatsııalyq jelilerdi de qamtıdy. Ońtústik óńirlerde jalpy uzyndyǵy 857 shaqyrym bolatyn, 65 myń gektar jerdi sýarýmen qamtamasyz etetin 103 kanalda jumystar bastaldy. Jalpy uzyndyǵy 1 184 shaqyrym bolatyn taǵy 270 rekonstrýktsııalanǵan kanal avtomattandyrylǵan basqarý júıesine kóshirilip jatyr, — dep habarlady mınıstrlikten.
Budan bólek sýdy esepke alýdyń zamanaýı júıeleri qarastyrylǵan 264 kanaldy rekonstrýktsııalaý jobasy ázirlenýde. Bul sý ysyrabynyń kólemin azaıtyp, sý bólýdiń dáldigin arttyrýǵa múmkindik beredi.
Aıta keteıik, Qazaqstanda 4,6 myń shaqyrym sý kanaly jańartylady.
