Sý salasy mamandyqtaryna túsetin stýdentter úshin grant sany 70%-ǵa artty

ASTANA. KAZINFORM - 2025-2026 oqý jylyna gıdrogeologııa jáne gıdrologııa sııaqty pánaralyq mamandyqtardy eseptemegende barlyǵy 1052 grant bólindi, dep habarlaıdy QR Sý resýrstary jáne ırrıgatsııa mınıstrliginiń baspasóz qyzmeti.

Baspasóz qyzmetiniń habarlaýynsha, bir jyl buryn Qazaqstannyń joǵary oqý oryndarynda sý sharýashylyǵy mamandyqtaryna 618 grant bólingen bolatyn. Sý sharýashylyǵy salasyna mamandar daıarlaıtyn joǵary oqý oryndarynyń sany da artyp keledi. Jańa oqý jylynan bastap Jáńgir han atyndaǵy Batys Qazaqstan agrarlyq-tehnıkalyq ýnıversıteti alǵash ret «Gıdromelıoratsııa» mamandyǵy boıynsha stýdentterdi qabyldaýdy josparlap otyr.

Bıyl sý salasynda óndiristik tájirıbeden ótken stýdentterdiń sany tórt ese ósken. Byltyr tájirıbeden ótken stýdentter sany 82 bolsa, bıyl bul kórsetkish 339-ǵa jetti.

«Memleket basshysy sý sharýashylyǵy salasyn jańa, bilikti kadrlarmen qamtamasyz etý jóninde naqty mindet qoıdy. Granttar sanynyń artýy – osy baǵyttaǵy mańyzdy qadam. Sonymen qatar Sý resýrstary jáne ırrıgatsııa mınıstrligi sý sharýashylyǵy mamandyqtaryna degen qyzyǵýshylyqty arttyrý boıynsha birqatar sharany ázirlep, iske asyryp jatyr. Olardyń qatarynda eńbekaqyny kóterý máselesi de bar», – dedi Sý resýrstary jáne ırrıgatsııa mınıstrliginiń Ǵylym jáne ınnovatsııalar departamentiniń dırektory Lazzat Júsipova.

Osyǵan deıin elimizde Ulttyq sý resýrstary aqparattyq júıesi ázirlenip jatqany týraly jazdyq.