Sý salasy mamandyqtaryna grantqa túsken stýdentter sany 71%-ǵa artty
ASTANA. KAZINFORM — 2025-2026 oqý jylynda sý salasy mamandyqtaryna, sonyń ishinde gıdrogeologııa men gıdrologııa boıynsha memlekettik grant ıelengen stýdentterdiń sany 894-ke jetti. Onyń ishinde 818-i bakalavrıat, 44-i magıstratýra, 32 adam doktorantýraǵa túsken. Bul týraly Sý resýrstary jáne ırrıgatsııa mınıstrligi málim etti.
Salystyrmaly túrde alsaq, byltyrǵy oqý jylynda osy mamandyqtar boıynsha grantqa 523 stýdent qabyldansa, 2023-2024 jyldary nebári 291 stýdent oqýǵa túsken edi. Bıyl sý salasyna aqyly negizde oqýǵa túsken stýdentter sany – 183 . Onyń ishinde 128-i bakalavrıatqa, 52-si magıstratýraǵa, 3 stýdent doktorantýraǵa qabyldanǵan. 2025 jyldyń qyrkúıegindegi jaǵdaı boıynsha joǵary oqý oryndarynda sý salasy baǵytynda bilim alyp jatqan stýdentterdiń jalpy sany – 2 101 adam. Al jumysshy kadrlardy daıarlaýmen 8 kolledj aınalysyp jatyr. Búginde bul bilim uıymdarynda 630 stýdent oqıdy.
– 2023 jylmen salystyrǵanda sý salasy mamandaryn daıarlaıtyn joǵary oqý oryndarynyń sany 9-dan 13-ke deıin artty. Olardyń árqaısysymen Sý resýrstary jáne ırrıgatsııa mınıstrligi yntymaqtastyq týraly memorandýmdar jasasty. Memorandýmdarǵa sáıkes, stýdentter mınıstrlikke qarasty sý sharýashylyǵy kásiporyndarynda tájirıbeden óte alady. Osy sharalardyń arqasynda bıyl mınıstrlikke qarasty kásiporyndarda óndiristik tájirıbeden ótken stýdentterdiń sany 5 esege artty, – dedi Sý resýrstary jáne ırrıgatsııa mınıstri Nurjan Nurjigitov.
Eske sala keteıik, Qazaqstan men Vengrııa qos dıplomdy magıstratýra baǵdarlamasyn iske qosqanyn jazǵan edik.