Sý salasy qyzmetkerleriniń jalaqysy 50%-ǵa deıin ósedi

ASTANA. KAZINFORM — Memleket basshysy sý salasy qyzmetkerleriniń jalaqysyn kóterýge baǵyttalǵan «Tabıǵı monopolııalar týraly» zańǵa ózgerister engizýdi kózdeıtin zańǵa qol qoıdy. B9l týraly Sý resýrstary jáne ırrıgatsııa mınıstrligi málim etti.

Túzetýlerdi Sý resýrstary jáne ırrıgatsııa mınıstrligi ázirledi. Ózgerister sýmen jabdyqtaý jáne sý burý qyzmetterin kórsetetin 25 myńnan astam qyzmetkerdiń jalaqysyn arttyrýǵa múmkindik beredi. Óńirge jáne statıstıkalyq derekterge qaraı jalaqy orta eseppen 35–50%-ǵa ósip, jylý jáne elektr energetıkasy salalaryndaǵy mamandardyń deńgeıine deıin jetedi.

Bul sý salasyndaǵy kadr turaqsyzdyǵyn azaıtyp, joǵary bilikti mamandardy tartýǵa jol ashady. «Tabıǵı monopolııalar týraly» zańǵa engizilgen ózgerister bıyl 1 qyrkúıekten bastap kúshine enedi.

– Statıstıkalyq málimetterge sáıkes, jylý jáne elektr energetıkasy salasynda ortasha jalaqy – 330 myń teńge. Al sý sharýashylyǵy salasynda – 231 myń teńge. Aıtarlyqtaı aıyrmashylyq bar. Qabyldanǵan túzetýler elimizdiń damýy úshin asa mańyzdy sý salasynyń kadrlyq áleýetin arttyrýǵa baǵyttalǵan, – dedi Sý resýrstary jáne ırrıgatsııa mınıstri Nurjan Nurjigitov. Byltyr Sý resýrstary jáne ırrıgatsııa mınıstrligi «Qazsýshar» RMK qyzmetkerleriniń jalaqysyn orta eseppen 25%-ǵa kótergenin eske sala keteıik.

Buǵan deıin habarlanǵandaı, Qazaqstanda jańa Sý kodeksi kúshine endi.