Sý resýrstaryn basqarýdyń 5 jyldyq baǵdarlamasyn ázirleý bastaldy
NUR-SULTAN. QazAqparat - Qazaqstannyń sý resýrstaryn basqarýdyń 2020-2030 jyldarǵa arnalǵan memlekettik baǵdarlamasy jobasyn ázirleý bastaldy. Bul jaıynda QR Premer-Mınıstri Asqar Mamınniń Senat depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Jalpy Parlamenttik tyńdaýdyń usynymdarymen Úkimet elimizdiń sý qaýipsizdigin saqtaý boıynsha qoıylǵan mindetterge baılanysty júıeli jumys júrgizýde. Memleket basshysynyń 2020 jylǵy 24 qańtardaǵy Úkimettiń keńeıtilgen otyrysynda bergen tapsyrmasyn oryndaý úshin Qazaqstannyń sý resýrstaryn basqarýdyń 2020-2030 jyldarǵa arnalǵan memlekettik baǵdarlamasynyń (budan ári – Membaǵdarlama) jobasyn ázirleý bastaldy. Eldiń sý resýrstaryn saqtaý jáne utymdy paıdalaný problemalaryn sheshýdiń negizgi joldarynan basqa memlekettik baǵdarlama boıynsha jumys aıasynda «Gıdrotehnıkalyq qurylystardyń qaýipsizdigi týraly» zańdy ázirleý qajettigi qaralatyn bolady. Ony retteý máni gıdrotehnıkalyq qurylystardyń qaýipsizdigin qamtamasyz etý protsesine barlyq qatysýshylardyń fýnktsııalaryn jáne olardyń jaýapkershilik sharalaryn naqty ajyratý bolýy múmkin«, - dedi Úkimet basshysy.
Onyń atap ótýinshe, Sý kodeksiniń 13-babynyń 4-tarmaqshasyna sáıkes bulaqtar jer asty sý nysandaryna jatqyzylǵan. Bul olardyń qurylysy men qalyptasýynyń erekshelikterimen baılanysty. Bulaqtar jer qoınaýyndaǵy atmosferalyq sýdyń esebinen qurylady. Sondyqtan olardyń sandyq jáne sapalyq sıpattamalaryn anyqtaý úshin gıdrologııalyq zertteý júrgizý qajet.
«Ekologııa, geologııa jáne tabıǵı resýrstar mınıstrligi 2019-2021 jyldary iske asyrý merzimimen sý resýrstarynyń aýdıti boıynsha aýqymdy jumystar júrgizýde. Osy jumys aıasynda kóshpeli dalalyq zertteýler júrgizýjosparlanǵan. Olardyń qorytyndysy boıynsha ózender, onyń ishinde olardyń qalyptasý aımaǵyndaǵy bulaqtarǵa qatysty aqparattyń aıtarlyqtaı kólemin jınaý jáne júıelendirý josparlanýda. Budan ári jınalǵan aqparatty óńdegennen keıin naqty sý nysandary, onyń ishinde bulaqtar boıynsha qosymsha zertteý jumystaryn júrgizý jóninde sheshimder qabyldanady. Sondaı-aq olardyń qorytyndysy boıynsha qajetti zańnamalyq retteý múmkindigi qaralady», - dedi Asqar Mamın.
