Sý resýrstary komıtetiniń tóraǵasy Islam Ábishev qamaýǵa alyndy

ASTANA. QazAqparat - QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev qamaýǵa alyndy, dep habarlaıdy QazAqparat.

«16 naýryzda Astana qalasynyń mamandandyrylǵan aýdanaralyq tergeý soty tergeý amaldaryn júrgizýshi organnyń ótinishin qarastyrdy. 2019 jyldyń 14 mamyryn qosa alǵanda, kúdikti Ábishev Islam Almahanulyna qatysty qamaýda ustaý túrindegi bultartpaý sharasyn sanktsııalaý týraly qaýly shyǵardy», - dep habarlady qalalyq sottyń baspasóz qyzmeti.

Sheneýnikti qamaýǵa alý sebepteri ázirge belgisiz.

«Qylmystyq protsestik kodekstiń normalaryna sáıkes, aldyn ala tergeý amaldaryn júrgizý ýaqytynda qandaı da bir derekter jarııalanýǵa jatpaıdy», - dep jaýap berdi baspasóz qyzmeti.

Eske sala ketsek, 15 naýryzda QR Aýyl sharýashylyǵy mınıstrligi Sý resýrstary komıtetiniń tóraǵasy Islambek Ábishev qyzmetinen ýaqytsha shettetildi.