Sý resýrstary komıteti tóraǵasynyń orynbasary men «AKKE Astana» JShS-niń dırektory ustaldy - qarjy polıtsııasy
ASTANA. 27 maýsym. QazAqparat - 25 maýsymda bıýdjet qarajattaryn jymqyrdy degen kúdikpen Sý resýrstary komıteti tóraǵasynyń orynbasary Kýmashev pen «AKKE Astana» JShS-niń dırektory Murat ustaldy.
Bul aqparatty Astana qalalyq ekonomıkalyq jáne sybaılas jemqorlyqqa qarsy kúres departamentiniń baspasóz qyzmeti taratyp otyr.
Vedomstvonyń aqparatyna sáıkes, Astana qalalyq qarjy polıtsııasy departamentiniń qyzmetkerleri respýblıkanyń 7 oblysynda ornalasqan 36 sý sharýashylyǵy júıelerin tekserýge bólingen 1,5 mlrd. teńgeni urlaý faktisi boıynsha Aýyl sharýashylyq mınıstrligi Sý resýrstary komıtetiniń laýazymdy tulǵalaryna jáne «AKKE Astana» JShS-niń basshylaryna qatysty qylmystyq isti tergeýde.
Olarǵa aıyp taǵylyp, tutqynǵa alý sanktsııasy sotqa jiberildi. Qylmystyq is tergelýde, ózge aqparat tergeý múddesine baılanysty jarııalanbaıdy.
