Sý resýrstary komıteti Esep komıtetiniń eskertpelerine jaýap berdi
«Bizde býhgalterlik jumystarda olqylyqtar boldy, alaıda bul komıtet múldem býhgalterııasyz jumys istedi degendi bildirmeıdi. Bizde balans tolyǵymen júrgiziledi, debıtorlyq-kredıtorlyq boryshtar tolyq jasalady, qazynashylyq jumys istep te jatyr. Jalpy komıtet 20 jylda birinshe ret tekserilip turǵan joq qoı», - deıdi Islam Ábishev. Onyń aıtýynsha, baqylaý nysanyna ilikken jalpy soma 74 mlrd. teńgeni quraıdy, al buzýshylyqtar anyqtalǵan soma 73 mlrd. teńge bolyp otyr. Sý resýrstary komıtetiniń basshysy bundaı jaǵdaı formaldy erejelerge baılanysty týyndaǵanyn alǵa tartady.
«Negizinen buzýshylyqtardyń basym bóligi protsedýralyq sıpatta bolyp tabylady. Máselen, 73 mlrd. teńgeniń 36 mlrd. teńgesi boıynsha atqarylǵan jumystardy qabyldaý aktisine «QazSý Sharýashylyǵy» qyzmetkerleriniń qol qoıǵany aıtylady, al bul mekeme Sý resýrstaryna qarasty kompanııa. Endi biz ózimizge qarasty mekeme qyzmetkerleri nege qol qoıýǵa bolmaıdy dep suraımyz, óıtkeni, olarda tıisti sertıfıkattar bar ǵoı. ıAǵnı, biz tapsyrys berýshi retinde ózimizdiń fýnktsııamyzdy olarǵa berip otyrsaq, olarǵa jergilikti jerlerde atqarylǵan qurylys jumystarynyń sapasyn baqylap, ony rastaýyna nege bolmaıdy? Biz buny durys dep sanamaımyz», - dedi komıtet basshysy.
Onyń aıtýynsha, komıtetke qarasty jylyna eń kemi 100 nysannyń qurylysy jóndeýden ótip, keıbiri jańadan salynady. Al ol nysandarynyń barlyǵyn eki adam aralap, qurylys sapasyn baqylap, soǵan qatysty qujattarǵa qol qoıýy da múmkin emes. Osyǵan baılanysty, komıtet basshysy qujatqa qol qoıýshylar eń aldymen jumys sapasynyń qalaı atqarylǵanyn baqylaýy kerektigin alǵa tartady. «Jalpy mundaı qujattarǵa jergilikti jerlerde qol qoıý tájirıbesi 2012 jyldan bastap júzege asyp keledi. Sodan beri dál osy qurylystar sapasyna qatysty eshqandaı da bir problemaly nysan bolǵan emes, al buryn olardyń sany 40-qa jýyqtaǵan edi», - deıdi Islam Ábishev.