Sý resýrstaryn basqarýǵa aýdıt pen spýtnıktik baqylaý engiziledi
ASTANA. KAZINFORM — Bas Prokýror Berik Asylovtyń tóraǵalyǵymen sý resýrstaryn paıdalaný máseleleri boıynsha vedomstvoaralyq keńes ótti, dep habarlaıdy vedomstvonyń baspasóz qyzmeti.
Іs-sharaǵa ekologııa jáne tabıǵı resýrstar, sý resýrstary, aýyl sharýashylyǵy mınıstrleri, sondaı-aq ýákiletti jáne múddeli memlekettik jáne quqyq qorǵaý organdarynyń basshylary qatysty.
Bas Prokýror sýdyń strategııalyq resýrs ári azyq-túlik jáne áleýmettik turaqtylyqtyń mańyzdy faktory ekenin atap ótti. Sý tapshylyǵy kúsheıip otyrǵan jaǵdaıda sý salasyn tıimdi, ashyq jáne ádil basqarýdyń mańyzy arta túsetinine nazar aýdaryldy. Talqylaý barysynda sý resýrstaryn óz betinshe alý, jabdyqtardy zańsyz ornatý jáne vegetatsııalyq kezeńde sýdy erkin belgilengen tarıftermen satý faktileri anyqtalǵany aıtyldy. Mundaı zań buzýshylyqtar adal sý paıdalanýshylardyń quqyqtaryn buzyp, memlekettik resýrstardy bólý júıesine nuqsan keltiredi jáne ýákiletti organdar tarapynan júıeli den qoıýdy talap etedi.
Keńeske qatysýshylar salada tártip ornatý úshin naqty ári keshendi sheshimder ázirleýdiń qajettigin atap ótti. Memleket basshysynyń tapsyrmasyn oryndaý maqsatynda sý resýrstaryna aýdıt júrgizýdi, táýekel aımaqtarynyń kartalaryn jasaýdy, sý ınfraqurylymyn damytýǵa baǵyttalǵan qarajatty qaıta qaraýdy, sý únemdeıtin sýarý tehnologııalaryn engizýdi, sondaı-aq sybaılas jemqorlyq pen kóleńkeli qarjylyq shemalardyń jolyn kesýdi kózdeıtin Jol kartasy ázirlendi.
— Negizgi basymdyq retinde aýyl sharýashylyǵy taýar óndirýshileriniń múddelerin qorǵaý jáne sý resýrstaryna ádil, utymdy ári únemdi qoljetimdilikti qamtamasyz etý aıqyndaldy. Memlekettik organdar úshin negizgi baǵyttar retinde sý resýrstaryn tsıfrlyq esepke alý jáne olardyń jumsalýyna spýtnıktik baqylaý júrgizý, sondaı-aq belgilengen sý lımıtterin eskere otyryp egis alqaptaryn josparlaý jáne aýyl sharýashylyǵy daqyldaryn irikteý belgilendi. Basty maqsat — sý resýrstaryn únemdeý jáne paıdalaný tıimdiligin arttyrý, — delingen habarlamada.
Keńes sońynda Bas Prokýror sý tasqyny kezeńine daıyndyq máselelerine de toqtaldy. Oblys prokýrorlaryna sý tasqynyna qarsy is-sharalardyń zańdylyǵy men tolyq iske asyrylýyn, sondaı-aq osy maqsattarǵa bólingen bıýdjet qarajatynyń tıimdi ári maqsatty paıdalanylýyn tekserý tapsyryldy. Atalǵan jumystardy júrgizý úshin 2025 jyly 72 mlrd teńge bólinip, tolyq ıgerilgeni atap ótildi.
Osydan buryn Berik Asylov prokýrorlyq qadaǵalaýdyń nátıjelerin jarııalaǵanyn jazǵan edik.