Sý resýrstaryn basqarýdyń ulttyq tsıfrlyq júıesi iske qosylady

ASTANA. KAZINFORM – Sý resýrstarynyń ulttyq aqparattyq júıesi 2026 jyldyń ekinshi jartysynda ónerkásiptik paıdalanýǵa beriledi. Bul týraly Sý resýrstary jáne ırrıgatsııa mınıstrligi habarlady. 

Sý resýrstary jáne ırrıgatsııa mınıstri Nurjan Nurjigitov Sý resýrstary aqparattyq-taldaý ortalyǵynyń (ATO) 2025 jylǵy jumys qorytyndysy boıynsha otyrys ótkizdi.

Byltyr ortalyq birqatar iri jobany iske asyrý aıasynda keshendi jumys atqardy. Atap aıtqanda, Ulttyq sý resýrstarynyń aqparattyq júıesin ázirleý, Balqash kólin saqtaý jónindegi keshendi sharalar, qysqa merzimdi jáne uzaq merzimdi gıdrologııalyq modeldeýdiń ozyq úlgilerin engizý, sýarmaly sýdy jetkizý boıynsha elektrondy sharttar jasaýǵa arnalǵan bıllıng júıesin ázirleý, qoǵamda sý únemdeý mádenıetin qalyptastyrýǵa baǵyttalǵan sharalar, QHR-men birlesken transshekaralyq basseınderdi zertteý, sondaı-aq sý resýrstary máseleleri boıynsha taldamalyq jáne ádistemelik materıaldar ázirleý jumystary júrgizildi.

Qazirgi ýaqytta Sý resýrstarynyń ulttyq aqparattyq júıesin jetildirý boıynsha josparlanǵan jumystardyń shamamen 80%-y oryndaldy, 8 negizgi modýl iske qosylyp, memlekettik derekqorlarmen 11 ıntegratsııa ornatyldy. Júıeni tolyq aıaqtaý jáne ónerkásiptik paıdalanýǵa berý osy jyldyń ekinshi jartysyna josparlanǵan.

Balqash kóli boıynsha Master-jospar qalyptastyrý maqsatynda 1980-2025 jyldar aralyǵyndaǵy bastapqy derekterdi jınaý, júıeleý jáne taldaý boıynsha aýqymdy jumys júrgizildi. Bıyl joba praktıkalyq kezeńge ótedi: derekterdi tekserý, dalalyq saparlar, semınarlar, massıvterdi jańartý.

Gıdrologııalyq modeldeýdiń ozyq tehnologııalaryn beıimdeý boıynsha jumysty QR-daǵy BUU Damý baǵdarlamasynyń qoldaýymen ATO mamandary júzege asyryp jatyr. Qazaqstan aýmaǵyndaǵy sý obektilerin tolyq gıdrologııalyq modeldeý 2027 jyldyń sońyna deıin aıaqtalady.

Sýarmaly sýdy ashyq ári ádil bólý maqsatynda pılottyq rejımde jańa bıllıng júıesi engizilip jatyr. Bul júıede sý paıdalanýshylar men «Qazsýshar» RMK arasyndaǵy ótinim berý, kelisimshart jasasý jáne sý jetkizý qyzmetteri úshin esep aıyrysý protsesteri tsıfrlandyrylǵan. Qazirgi tańda ATO mamandarynan quralǵan jumys toptary Qazaqstannyń ońtústik óńirlerinde túsindirý jáne uıymdastyrý jumystaryn júrgizýde.

2025 jyly ATO BUU Damý baǵdarlamasymen, Frantsııanyń damý agenttigimen, Germanııanyń halyqaralyq yntymaqtastyq jónindegi qoǵamymen, POWERCHINA ZHONGNAN ınjenerlik-konsaltıngtik kompanııasymen, Eýrazııalyq damý bankimen, ıÝNISEF-pen, «Eýrazııalyq top» JShS-men, Qazaqstannyń sý qaýymdastyǵymen jáne ózge de uıymdarmen kelisimder men memorandýmdarǵa qol qoıdy.

Byltyr jeltoqsan aıynda ortalyqtyń dırektorlar keńesi 2026 jylǵa arnalǵan josparlaryn bekitti. Bul josparlar segiz basseındik jospardy ázirleýdi, sý paıdalanýdy boljaý júıesin qurýdy, sý qorǵaý aımaqtary men beldeýleriniń shekaralaryn aıqyndaýdy, ekologııalyq aǵyndy esepteýdi, sý kadastryn tsıfrlandyrýdy, Ortalyq Azııa sý basseınderin zertteýdi jáne Sý resýrstarynyń ulttyq aqparattyq júıesin ónerkásiptik paıdalanýǵa engizýdi qamtıdy.

— Sý salasyn tsıfrlandyrý, sý únemdeý mádenıetin qalyptastyrý jáne jerústi men jerasty sýy boıynsha derekterdi biriktiretin biryńǵaı júıe qurý jónindegi Memleket basshysynyń tapsyrmalaryn oryndaý baǵytynda Aqparattyq-taldaý ortalyǵynyń aldynda birqatar mańyzdy mindet tur. Ortalyqtyń alǵashqy jumys jyly osy bastamalardy sapaly iske asyrýdyń negizin qalady. Bıyl barlyq bastalǵan jumysty ýaqytyly aıaqtaýǵa, sonyń ishinde ozyq halyqaralyq tájirıbeni engizýge basa nazar aýdarý qajet, — dedi Sý resýrstary jáne ırrıgatsııa mınıstri Nurjan Nurjigitov.

Aıta ketelik bıyl transshekaralyq sý resýrstarynyń spýtnıktik derekterimen almasý platformasy iske qosylady.