Sý resýrstary jáne ırrıgatsııa mınıstrligi sý salasyn tsıfrlandyrýǵa nıetti
ASTANA. KAZINFORM – Sý resýrstary jáne ırrıgatsııa mınıstrligi Azııa jáne Tynyq muhıty óńirine arnalǵan ekonomıkalyq jáne áleýmettik komıssııamen sý salasyn tsıfrlandyrý boıynsha yntymaqtastyq ornatýǵa nıetti. Bul týraly vedomstvonyń baspasóz qyzmeti málim etti.
Sý resýrstary jáne ırrıgatsııa mınıstri Nurjan Nurjigitov Azııa jáne Tynyq muhıty óńirine arnalǵan ekonomıkalyq jáne áleýmettik komıssııanyń Atqarýshy hatshysy Armıda Alıshahbana bastaǵan BUU delegatsııasymen kezdesti. Taraptar sý salasyn tsıfrlandyrý baǵytyndaǵy yntymaqtastyq múmkindikterin talqylady. Nurjan Nurjigitov búginde mınıstrlik Birikken Ulttar Uıymynyń Damý baǵdarlamasymen birlese sý tasqynyn boljaý jáne modeldeý boıynsha TALSIM (Germanııa) jáne Delft-FEWS (Nıderlandy) júıelerin Qazaqstanǵa beıimdeý boıynsha jumys júrgizip jatqanyn málimdedi. Sondaı-aq, bilikti mamandarmen sý salasynyń áleýetin arttyrý baǵytynda atqarylyp jatqan jumystar jaıly aıtty.
«Elimizdegi 9 joǵary oqý ornymen yntymaqtastyq týraly memorandýmǵa qol qoıdyq. Bıyl «Bolashaq» baǵdarlamasyna sý salasynyń mamandyqtary qosyldy. Qazaqstandyq 2 ýnıversıtet Tashkent ırrıgatsııa jáne aýylsharýashylyǵyn mehanıkalandyrý ınjenerleri ınstıtýtymen qosdıplomdy bilim berýdiń birlesken baǵdarlamasyn iske qosty. Taraz qalasynda jeke Ulttyq sý sharýashylyǵy jáne ırrıgatsııa ýnıversıteti ashyldy. Endigi maqsatymyz — osy oqý oryndaryna sheteldik úzdik professor-oqytýshylardy ákelý. Biz Qazaqstanǵa kelýge nıetti nemese qashyqtan oqytýǵa daıyn mamandarmen jumys isteýge ázirmiz», — dedi Nurjan Nurjigitov. Armıda Alıshahbana mınıstrliktiń sý resýrstaryn damytý jáne qorǵaý, sondaı-aq Aral teńizin qalpyna keltirý jobalaryn joǵary baǵalady.
Al, BUU delegatsııasy jan-jaqty qoldaý kórsetýge daıyn ekenin aıtty.
«Biz óz tarapymyzdan Qazaqstan Respýblıkasynyń «Halyqaralyq Araldy qutqarý» qoryna tóraǵalyǵy aıasynda Ortalyq Azııa memleketteriniń transshekaralyq sý resýrstaryn paıdalaný máselesin retteýge kómek kórsetýge daıynbyz. Sondaı-aq, qazaqstandyq mamandardy sý salasynda tájirıbe almasý maqsatynda uıymdastyrylatyn bizdiń túrli is-sharalarymyzǵa jáne muzdyqtardy qorǵaý jónindegi halyqaralyq jobaǵa qatysýǵa shaqyramyz», — dedi BUU Azııa jáne Tynyq muhıty óńirine arnalǵan ekonomıkalyq jáne áleýmettik komıssııanyń Atqarýshy hatshysy Armıda Alıshahbana.
