Sý resýrstary salasynda ÚEU-men yntymaqtastyqty damytýǵa arnalǵan jańa keńes quryldy
ASTANA. KAZINFORM — Sý resýrstary jáne ırrıgatsııa mınıstrligi janynan úkimettik emes uıymdarmen ózara is-qımyl jónindegi úılestirý keńesi qurylady, dep habarlaıdy Sý resýrstary jáne ırrıgatsııa mınıstrligi.
XII Azamattyq forým qarsańynda Sý resýrstary jáne ırrıgatsııa mınıstri Nurjan Nurjigitov qoǵamdyq uıymdar men úkimettik emes uıymdardyń ókilderimen kezdesti. Іs-sharaǵa Qazaqstan Azamattyq alıansynyń Prezıdenti Baný Nurǵazıeva jáne «Azamattyq bastamalardy qoldaý ortalyǵy» KEAQ basqarma tóraǵasy Lıma Dıas qatysty.
Kezdesýde Nurjan Nurjigitov vedomstvonyń sońǵy eki jylda atqarǵan jumystary týraly aıtty. Qatysýshylar sý resýrstaryn baqylaý tetikterin jáne sý únemdeý mádenıetin qalyptastyrýǵa baǵyttalǵan jobalardy júzege asyrýdaǵy yntymaqtastyqty talqylady. Úkimettik emes uıym ókilderi sý resýrstaryn basqarý salasyndaǵy memlekettik bastamalardy iske asyrý boıynsha óz usynystaryn bildirdi. Bul usynystar XII Azamattyq forýmynda eskeriledi.
Kezdesý qorytyndysy boıynsha Sý resýrstary jáne ırrıgatsııa mınıstrligi janynan ÚEU-men ózara is-qımyl jónindegi úılestirý keńesin qurý týraly sheshim qabyldandy.
— Bizdiń mınıstrlik úkimettik emes sektormen yntymaqtastyqty tıimdi ári turaqty sý saıasatynyń ajyramas bóligi dep sanaıdy. Mysaly, jańa Sý kodeksiniń basty maqsattarynyń biri — qoǵamnyń sý resýrstaryn basqarýǵa belsendi qatysýyn qamtamasyz etý. Basseındik keńester arqyly sý paıdalanýshylar, bıznes, ekologııalyq uıymdar men ǵylymı orta ókilderine sheshimderge yqpal etý múmkindigi berildi. Qoǵamnyń rólin kúsheıtý — sý salasyndaǵy sheshimder jergilikti jerdegi naqty máselelerdi kórip otyrǵan azamattardyń pikirin eskere otyryp qabyldanady degen sóz, — dedi Sý resýrstary jáne ırrıgatsııa mınıstri Nurjan Nurjigitov.
Mınıstrdiń ÚEU ókilderimen kezdesýi 15-16 qazanda ótetin XII Azamattyq forýmǵa daıyndyqtyń ekinshi kezeńi aıasynda ótti. Azamattyq forým — memleket pen azamattyq qoǵam arasyndaǵy ashyq ári konstrýktıvti dıalogqa arnalǵan ulttyq alań. Ol eki jylda bir ret ótkiziledi jáne memlekettik organdardyń, úkimettik emes uıymdardyń, halyqaralyq qurylymdardyń, bıznes ókilderiniń, sarapshylar men ǵylymı qaýymdastyqtyń basyn qosady. Daıyndyqtyń alǵashqy kezeńinde, mamyrdan qyrkúıekke deıin elimizdiń 20 óńirinde qoǵam ókilderimen kezdesýler ótti. Onyń nátıjesinde forým qatysýshylarynyń usynystaryn júzege asyrýǵa baǵyttalǵan is-qımyl josparlary qabyldandy.
Aıta keteıik, Memleket basshysy Qasym-Jomart Toqaev bıylǵy Joldaýynda Sý resýrstarynyń biryńǵaı tsıfrlyq platformasyn qurýdy tapsyrdy. Ol gıdrogeologııalyq monıtorıng mindetterin tolyqqandy sheshýge múmkindik beredi. Kazinform tilshisi osy bastamanyń júzege asyrylý barysyna sholý jasady.