Sý resýrstary mınıstrligi úsh oblystaǵy sý qoımalarynda shaǵyn SES salmaq
ASTANA. KAZINFORM - Sý resýrstary jáne ırrıgatsııa mınıstrliginiń «Qazsýshar» mekemesi Qaraǵandy oblysyndaǵy Samarqand sý qoımasynda, Aqtóbe oblysyndaǵy Qarǵaly sý qoımasynda jáne Abaı oblysyndaǵy Qarakól sý qoımasynda shaǵyn sý elektr stantsııalaryn (SES) salý boıynsha jobalaý-smetalyq qujat ázirlep jatyr.
Mınıstrliktiń baspasóz qyzmetiniń habarlaýynsha, qazirgi ýaqytta úsh joba da memlekettik saraptamadan ótip jatyr.
Sondaı-aq taǵy bes nysan boıynsha jobalaý-smetalyq qujat ázirleý josparlanyp otyr. Onyń ishinde úsh joba jeke ınvestorlardy tartý arqyly júzege asyrylady.
Bul jumystar byltyr qyrkúıek aıynda qabyldanǵan «Qazsýshar» RMK-nyń gıdrotehnıkalyq qurylysjaılarynda shaǵyn SES damytý jónindegi Jol kartasy aıasynda júrgizilip jatyr. Qazirgi tańda shaǵyn SES ornatýǵa jaramdy 29 nysan iriktelip alynǵan.
- Jol kartasyn iske asyrý nátıjesinde «Qazsýshar» RMK-nyń gıdrotehnıkalyq nysandarynda jyl saıyn óndiriletin elektr energııasynyń jalpy kólemi 30 MVt-qa jetedi. Qazirgi ýaqytta kásiporyn teńgeriminde úsh shaǵyn SES bar. Olar Soltústik Qazaqstan oblysyndaǵy Sergeev gıdrotorabynda, Qaraǵandy oblysyndaǵy Yntymaq sý qoımasynda jáne Qorǵas ózenindegi «Dostyq» gıdrotorabynda ornalasqan, - dedi Sý resýrstary jáne ırrıgatsııa vıtse-mınıstri Erbolat Ibraıhanov.
Osyǵan deıin Sý resýrstary mınıstri Qazaqstanda eń dámdi sý qaı óńirde ekenin aıtqan bolatyn.
