Sý resýrstary mınıstrligi Úlken Almaty kanalyn betondaý boıynsha joba ázirlep jatyr
ASTANA. KAZINFORM - Sý resýrstary jáne ırrıgatsııa mınıstri Nurjan Nurjigitov Almaty oblysy Eńbekshiqazaq aýdanyna jumys saparymen baryp, D. Qonaev atyndaǵy Úlken Almaty kanalynyń ýchaskelerin rekonstrýktsııalaý jumystarynyń nátıjesimen tanysty, dep habarlaıdy mınıstrliktiń baspasóz qyzmeti.
Aıta keteıik, bıyl kanaldyń jalpy uzyndyǵy 1,53 shaqyrym bolatyn apatty ýchaskelerin rekonstrýktsııalaý jumystary aıaqtaldy. Sý shyǵynyn azaıtý jáne 33,3 myń ga jerdi sapaly sýarýdy qamtamasyz etý maqsatynda arnany monolıtti temirbetonmen qaptaý jumystary júrgizildi.
Joba nátıjelerimen tanysqan Nurjan Nurjigitov mınıstrliktiń Sý sharýashylyǵy komıtetine nysandy paıdalanýǵa túpkilikti qabyldamas buryn muqııat tekserýdi tapsyrdy.
-Kelesi jyldyń vegetatsııa kezeńine deıin kanaldyń tolyq daıyn bolýyn qamtamasyz etý qajet. Aýyl sharýashylyǵy taýaryn óndirýshilerge sý jetkizýde eshqandaı másele bolmaýy kerek. Sonymen qatar Úlken Almaty kanalynyń basqa ýchaskelerin rekonstrýktsııalaýǵa qajetti qujattardy ázirleý jumystaryn ýaqytyly aıaqtaý qajet, – dedi sý sharýashylyǵy vedomstvosynyń basshysy.
Eske sala keteıik, Sý resýrstary jáne ırrıgatsııa mınıstrligi Úlken Almaty kanalyn úsh kezeńmen rekonstrýktsııalaýdy josparlap otyr. Qazirgi ýaqytta uzyndyǵy 15,6 shaqyrym bolatyn ýchaskeni betondaý jobasy ázirlendi.
Sonymen qatar jalpy uzyndyǵy 110 shaqyrym bolatyn basqa ýchaskelerdi rekonstrýktsııalaýǵa qajetti qujattar ázirlenip jatyr. Jumystyń úshinshi kezeńinde Úlken Almaty kanalynyń bas sý qurylysy jóndeledi.
Kanaldy rekonstrýktsııalaý onyń ótkizý qýatyn jobalyq kórsetkishke deıin jetkizýge jáne Almaty oblysynyń sýarmaly jerlerine sý berýdi jaqsartýǵa múmkindik beredi.
Osyǵan deıin Túrkistan, Aqtaý jáne Atyraý sý únemdeý jobasyna qosylatyny týraly jazdyq.
