Sý resýrstary mınıstrligi sýdyń «kóleńkeli naryǵymen» qalaı kúresip jatyr

ASTANA. KAZINFORM - Sý resýrstary jáne ırrıgatsııa mınıstri Nurjan Nurjigitov Qyzylorda oblysynyń ákimdiginde óńirdiń quqyq qorǵaý organdary basshylarynyń qatysýymen sýdyń «kóleńkeli naryǵyna» qarsy kúres máseleleri boıynsha keńes ótkizdi.

Mınıstrliktiń baspasóz qyzmetiniń habarlaýynsha, jıynda zańsyz sý alýdy anyqtaý úshin mınıstrlik mamandarynan qurylǵan monıtorıng tobynyń jumysy boıynsha esep tyńdaldy.

Sýdy zańsyz paıdalanýmen kúresý úshin mınıstrlik sý obektilerine turaqty monıtorıng júrgizý, sý zańnamasyn buzýshylarǵa qatysty jaýapkershilikti kúsheıtý jáne sýarmaly sýdy paıdalaný erejelerin qabyldaý syndy birqatar naqty sharany qolǵa aldy.

Bıyl 10 maýsymda sýamaly sýdy paıdalaný erejeleri kúshine endi. Erejede bekitilgen tarıften eki eselengen mólsherde kelisimshartsyz sýdy tutynǵany úshin aıyppul sanktsııalary qarastyrylǵan. Sondaı-aq sý jetkizýshiniń kelisiminsiz ósiriletin daqyldardyń túrin ózgertken jaǵdaıda bekitilgen tarıften bir jarym ese joǵary aıyppul salynady.

Sýdyń «kóleńkeli naryǵyna» qarsy kúresti kúsheıtý úshin Sý resýrstary jáne ırrıgatsııa mınıstri Nurjan Nurjigitov quqyq qorǵaý organdarynyń ókilderine sý vedomstvosy qurǵan jumys toptaryna qosylýdy usyndy.

«Memleket basshysynyń tapsyrmasyna saı mınıstrlik sýdyń «kóleńkeli naryǵymen» belsendi kúres júrgizip keledi. Bul salada ashyqtyq pen tártipti, sý resýrstarynyń ádil bólinýin qamtamasyz etip qana qoımaı, sý paıdalanýshylardyń quqyǵyn qorǵaý úshin de óte mańyzdy. Sýdy zańsyz paıdalanýshylardyń áreketin áshkere etip, tártip ornatý úshin quqyq qorǵaý organdarymen birlesken jumysty kúsheıtý kerek»,- dedi Sý resýrstary jáne ırrıgatsııa mınıstri Nurjan Nurjigitov.

Osyǵan deıin Sý resýrstary mınıstrligi Frantsııa mamandarymen birlesip Balqash kóli basseınine zertteý júrgizgeni týraly jazdyq.