Sý resýrstary mınıstrligi Frantsııa mamandarymen birlesip Balqash kóli basseınine zertteý júrgizdi
ASTANA. KAZINFORM - Sý resýrstary jáne ırrıgatsııa mınıstrligi Frantsııa mamandarymen birlesip Balqash kóli basseınine zertteý júrgizdi, Almaty oblysynyń Balqash aýdanynda keń aýqymdy dalalyq ekspedıtsııa ótti.
Ony Sý resýrstary jáne ırrıgatsııa mınıstrligi men Frantsýz ǵylymı konsortsıýmy, elimizdiń ǵylymı uıymdary jáne jergilikti atqarýshy organdarmen birlesip uıymdastyrdy.
Ekspedıtsııanyń maqsaty – Balqash kóli basseınindegi sý resýrstarynyń jaı-kúıin keshendi zertteý, onyń ishinde jerústi jáne jerasty sýlarynyń monıtorıngi, sýarmaly aýyl sharýashylyǵy alqaptaryn taldaý, óńirdiń sý balansyn modeldeý úshin dalalyq derekterdi jınaý jáne tekserý.
Ekspedıtsııa quramyna Frantsýz ǵylymı konsortsıýmynyń sarapshylary, Sý resýrstary jáne ırrıgatsııa mınıstrligi, Balqash-Alakól basseındik ınspektsııasy, «Qazgıdrogeologııa» ulttyq gıdrogeologııa qyzmeti, Ý.M. Ahmedsafın atyndaǵy gıdrogeologııa jáne geoekologııa ınstıtýty jáne «Qazaqmys korporatsııasy» JShS ókilderi endi.
Mamandar Boıaýly, Bereke, Baqanas, Baqbaqty jáne Birlik aýyldyq okrýgterindegi sýarý júıelerin aralap kórdi. Tekserý barysynda aýyl sharýashylyǵy alqaptaryn sýmen qamtý, kanaldardyń tehnıkalyq jaı-kúıi, ınfraqurylymdy jańartý qajettiligi jáne sý únemdeý tehnologııalaryn engizý máseleleri talqylandy.
Sondaı-aq sýdy qaıta paıdalaný, melıoratsııalyq júıelerdiń jaı-kúıi jáne jerasty sýlarynyń deńgeıi týraly da aıtyldy. Ekspedıtsııa qatysýshylary Almaty oblysynyń negizgi sý aıdyndaryn, onyń ishinde Qapshaǵaı sý qoımasyn, Іle ózeniniń saǵasyn, melıoratsııalyq jáne artezıan uńǵymalaryn jáne Sorbulaq kólin aralady. Sondaı-aq Almatydaǵy jetekshi ǵylymı-zertteý ınstıtýttarynda kezdesýler uıymdastyryldy.
«Zertteý qorytyndysy boıynsha memlekettik organdar men múddeli taraptarǵa usynystar qamtylǵan taldamalyq esep daıyndalady. Frantsýz sarapshylarymen birlesip iske asyrylyp jatqan bul joba 2040 jylǵa deıingi boljammen Balqash kólin saqtaý boıynsha master-jospar ázirleýge baǵyttalǵan. Júrgizilip jatqan zertteýler Qazaqstan men Frantsııa arasyndaǵy ekologııa, sý paıdalaný jáne ǵylymı almasý salasyndaǵy strategııalyq áriptestikti nyǵaıtýǵa baǵyttalǵan mańyzdy qadam», – dedi QR Sý resýrstary jáne ırrıgatsııa mınıstrliginiń Sý saıasaty departamenti dırektorynyń orynbasary Marat Imanalıev.
Eske salsaq, byltyr jeltoqsan aıynda Sý resýrstary jáne ırrıgatsııa mınıstrligi, Frantsııanyń damý agenttigi (AFD) jáne Frantsııanyń Geologııalyq jáne taý-ken zertteý bıýrosy (BRGM) arasynda Balqash kóli basseınin birlesip zertteý jáne kóldi saqtaý boıynsha master-jospar ázirleýge grant bólý qarastyrylǵan úshjaqty kelisimge qol qoıylǵan bolatyn.
Osyǵan deıin bıyl jazda Balqash kýrorttyq aımaǵyna qosymsha poıyzdar qatynaıtyny týraly jazdyq.