Sý resýrstary mınıstrligi engizgeli otyrǵan tsıfrlyq júıe nesimen tıimdi
ASTANA. KAZINFORM - Sý resýrstary jáne ırrıgatsııa mınıstri Nurjan Nurjigitov Qazaqstan Respýblıkasy Prezıdentiniń janyndaǵy Ulttyq ǵylym akademııasynyń prezıdenti Aqylbek Kúrishbaevpen kezdesti.
Kezdesýde taraptar sý sharýashylyǵy salasyn tsıfrlandyrý máselelerin talqylady.
Atap aıtqanda, sý resýrstaryn basqarýdyń ıntegratsııalanǵan DeepBas júıesin engizý máselesine nazar aýdaryldy.
Joba sý balansyn boljaý dáldigin arttyrýǵa, resýrstardy bólýdi ońtaılandyrýǵa, qurǵaqshylyq pen sý tasqynyna baılanysty táýekelderdi ýaqytyly anyqtaýǵa jáne aldyn alýǵa baǵyttalǵan. Júıe ártúrli kózderden alynǵan derekterdi biriktirýge jáne basqarýdyń negizdelgen sheshimderin qabyldaýǵa arnalǵan. Kezdesýge qatysýshylar jobanyń pılottyq baǵyttaryn jáne ony iske asyrý merzimderin pysyqtaýǵa kelisti, sondaı-aq DeepBas júıesiniń jumys prıntsıpterin talqylady. Oǵan qosa, aqparattyq qaýipsizdik pen jerasty sýyn monıtorıngteý máselelerine de erekshe nazar aýdaryldy.
- Biz aldymyzda turǵan maqsattarǵa qol jetkizý ozyq halyqaralyq tájirıbeni, úzdik praktıkalar men tehnologııalardy zerdeleý jáne engizýmen tyǵyz baılanysty ekenin túsinip otyrmyz. Qazirgi zamanǵy ǵylymı ázirlemeler memlekettik sý sharýashylyǵy saıasatynyń tıimdiligin arttyrýǵa jańa múmkindikter ashady. Sondyqtan QR UǴA usynǵan DeepBas júıesin ázirleý bastamasyn qoldaımyz, - dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin Nurjan Nurjigitov Qazaqstan sý qaýipsizdigi boıynsha BUU-men birlese jumys isteýge daıyn ekenin aıtqan bolatyn.
