Sý resýrstary mınıstrligi bilim berý baǵdarlamasyna jańa mamandyqtardy engizýdi usyndy
QR Sý resýrstary mınıstrligi joǵary jáne joǵary oqý ornyndarynyń keıingi bilim berý baǵdarlamasyna jańa mamandyqtardy engizýdi usyndy, dep habarlaıdy Kazinform mınıstrliktiń baspasóz qyzmetine silteme jasap.
QR Sý resýrstary jáne ırrıgatsııa mınıstrligi joǵary jáne joǵary oqý ornynan keıingi bilim berý mamandyqtarynyń qoldanystaǵy jikteýishine túzetýler engizip, birqatar mamandyqtardy qosýdy usyndy.
Atap aıtqanda, «Gıdrotehnıkalyq qurylys jáne nysandar», «Melıoratsııa jáne sýarmaly eginshilik», «Eldimekenderdi sýmen jabdyqtaý jáne sý burý», «Sý resýrstaryn basqarý», «Gıdrotehnıkalyq melıoratsııa», «Sý sharýashylyǵyndaǵy tehnologııalyq protsesterdi avtomattandyrý jáne basqarý», «Innovatsııalyq tehnologııalar jáne olardy sý sharýashylyǵynda paıdalaný», «Irrıgatsııalyq júıelerdegi gıdroenergetıkalyq nysandar», «Gıdromelıoratsııalyq jumystardy mehanıkalandyrý», «Sý sharýashylyǵy ekonomıkasy» mamandyqtary.
Dál osy mamandyqtardy magıstratýra jáne doktorantýra baǵdarlamalaryna da qosý usynylady. Al, beıindi joǵary oqý oryndarynyń stýdentteri gıdrotehnıkalyq qurylystardyń barlyq túri bar mınıstrliktiń vedomstvolyq baǵynysty uıymdarynda óndiristik praktıkadan ótedi dep josparlanyp otyr.
Sondaı-aq, mınıstrlik qazaqstandyq stýdentterdi sý salasy mamandyqtary boıynsha jaqyn jáne alys shetelderdiń joǵary oqý oryndarynda oqytý úshin grant bólý máselesin de qaraýǵa nıetti. Budan bólek, sý sharýashylyǵy qyzmetkerleriniń biliktiligin arttyrý ortalyqtary uıymdastyrylady. Al halyqaralyq seriktestermen birlesip joǵary oqý oryndarynda jańadan «Sý dıplomatııasy» mamandyǵyn engizý josparlanýda.
«Kadr tapshylyǵy máselesin sheshý úshin mınıstrlik sý resýrstaryn basqarý, paıdalaný jáne qorǵaý salasyndaǵy mamandardy daıarlaý jáne olardyń biliktiligin arttyrý baǵdarlamalaryn jetildirý jóninde qajetti sharalar qabyldaýǵa nıetti. Sý sharýashylyǵy mamandarynyń jalaqysyn arttyrý máselesi jeke qaralatyn bolady. Sonymen qatar, biz basqa elderdiń tıimdi tájirıbesin qabyldaıtyn bolamyz. Ol úshin halyqaralyq baılanys baǵytynda belsendi jumys júrgizilip jatyr», - dedi QR Sý resýrstary jáne ırrıgatsııa mınıstri Nurjan Nurjigitov.
