Sý resýrstary mınıstrligi 29 gıdrotehnıkalyq nysanǵa kópfaktorly zertteý júrgizip jatyr

ASTANA. KAZINFORM - Sý resýrstary jáne ırrıgatsııa mınıstrliginiń «Qazsýshar» mekemesi 29 gıdrotehnıkalyq nysanǵa kópfaktorly zertteý júrgizip, 42 nysan boıynsha qaýipsizdik deklaratsııalaryn ázirlep jatyr, dep habarlaıdy mınıstrliktiń baspasóz qyzmeti.

Baspasóz qyzmetiniń habarlaýynsha, oblys ákimdikteri qazirgi tańda 19 gıdrotehnıkalyq nysanǵa kópfaktorly zertteý jumystaryn júrgizip jatyr. Búginde Aqmola, Mańǵystaý jáne Pavlodar oblystaryndaǵy úsh nysanda jumystar aıaqtaldy. Al Shyǵys Qazaqstan, Batys Qazaqstan jáne Soltústik Qazaqstan oblystarynda zertteý jalǵasady.

Sý salasyn damytýdyń keshendi jospary aıasynda bıyl ákimdikter 10 oblysta 105 gıdrotehnıkalyq nysandy zertteýdi josparlap otyr. Olar: Aqmola, Aqtóbe, Almaty, Jambyl, Shyǵys Qazaqstan, Batys Qazaqstan, Qostanaı, Mańǵystaý, Pavlodar jáne Soltústik Qazaqstan oblystary.

«Jalpy 2028 jyldyń sońyna deıin 557 gıdrotehnıkalyq nysanǵa zertteý júrgizý josparlanǵan. Kópfaktorly zertteý obektiniń jáne onyń jabdyqtarynyń tehnıkalyq jaǵdaıyn, sondaı-aq qajet bolatyn jóndeý jumystarynyń kólemi men túrlerin naqtylaýǵa múmkindik beredi. Byltyr Sý resýrstary jáne ırrıgatsııa mınıstrligi 14 oblysta 84 nysanda kópfaktorly zertteý júrgizdi. Bul josparlanǵannan da artyq», - dedi Sý resýrstary jáne ırrıgatsııa vıtse-mınıstri Erbolat Ibraıhanov.

Osyǵan deıin ulttyq sý resýrstary aqparattyq júıesi ázirlenip jatqany týraly jazdyq.