Sý resýrstary mınıstrligi 1,3 mln adamdy aýyz sýmen qamtý úshin 2500 shaqyrym sý qubyryn salyp jatyr

ASTANA. KAZINFORM — Elimizdiń 9 oblysynda jalpy sany 30 sý qubyryn salý jáne qaıta jańartý jobasy júzege asyrylyp jatyr. Bul týraly vedomstvo habarlady.

Olar: Aqmola, Atyraý, Almaty, Qyzylorda, Túrkistan, Batys Qazaqstan, Soltústik Qazaqstan, Mańǵystaý jáne Ulytaý oblystary. Barlyq joba júzege asqanda, shamamen 1,3 mıllıon adam turatyn 468 eldi mekende aýyz sý jaǵdaıy jaqsarady.

«Prezıdenttiń qazaqstandyqtardy aýyz sýmen tolyqtaı qamtamasyz etý jónindegi tapsyrmasyn oryndaý aıasynda byltyr toptyq sý qubyrlaryn salý jáne qaıta jańartý boıynsha 8 joba aıaqtaldy. Jumystar elimizdiń alty óńirinde júrgizildi. Olar: Aqmola, Almaty, Qyzylorda, Soltústik Qazaqstan, Mańǵystaý jáne Ulytaý oblystary. Bul 208 myń adam turatyn 49 eldi mekenniń sýmen qamtylý jaǵdaıyn jaqsartty», – dedi Sý resýrstary jáne ırrıgatsııa vıtse-mınıstri Erbolat Ibraıhanov.