Sý resýrstary mınıstrligi 10 toptyq sý qubyryn jergilikti atqarýshy organdardyń qaramaǵyna berdi

ASTANA.KAZINFORM — Sý resýrstary jáne ırrıgatsııa mınıstrligi 10 toptyq sý qubyryn jergilikti atqarýshy organdardyń qaramaǵyna berdi. Bul týraly vodomstvonyń baspasóz qyzmeti málim etti.

Sý resýrstary jáne ırrıgatsııa mınıstrligi toptyq sý qubyrlaryn jergilikti atqarýshy organdarǵa berý jumysyn júrgizip jatyr. Qazirgi tańda 10 nysan ákimdikterge berildi. Olardyń 4-eýi Mańǵystaý oblysynda, taǵy 4-eýi Batys Qazaqstan oblysynda jáne qalǵan ekeýi Aqmola men Abaı oblystarynda.

Qazirgi tańda 11 toptyq sý qubyryn jergilikti atqarýshy bılikke berý jumysy jalǵasyp jatyr. Onyń 9-ynyń qujattary Memlekettik múlik jáne jekeshelendirý departamentterinde. Jalpy sany 41 toptyq sý qubyryn ákimdikterge berý josparlanyp otyr.

Jergilikti atqarýshy organdardyń kommýnaldyq ınfraqurylymdy tikeleı basqarýǵa qajetti ókilettikteri men quraldary bar. Olar tarıfterdi bekitedi, bıýdjet qarajatyn bóledi, sondaı-aq paıdalaný men qaıta jańǵyrtýǵa ketetin shyǵyndardy jergilikti jáne respýblıkalyq baǵdarlamalarǵa engize alady. Toptyq sý qubyrlaryn ákimdikterge berý – jelilerdi júıeli túrde kútip ustaý men jóndeý arqyly apattyq jaǵdaılardy azaıtýǵa múmkindik beredi. Sonymen qatar bul shara shyǵyndardy naqty ári ashyq esepke alýǵa, bıýdjet qarajatyn tıimdi paıdalanýǵa jol ashady, sýdyń ysyrabyn azaıtady jáne júıelerdiń energııa tıimdiligin arttyrady.

Odan bólek, tsıfrlandyrý men avtomattandyrý úderisin de jedeldetedi. Nátıjesinde, turǵyndar taza aýyzsýǵa turaqty ári úzdiksiz qol jetkizedi. Bul – sý salasyndaǵy memlekettik saıasattyń basty mindetteriniń biri.

– Sonymen qatar Sý resýrstary jáne ırrıgatsııa mınıstrligi 1,3 mln adamdy aýyz sýmen qamtamasyz etý úshin uzyndyǵy 2,5 myń shaqyrymnan asatyn sý qubyryn salý jáne rekonstrýktsııalaý jumysyn júrgizip jatyr. Búginde eldiń 9 oblysynda jalpy sany 31 joba iske asyrylýda. 2024 jyly Aqmola, Almaty, Qyzylorda, Soltústik Qazaqstan, Mańǵystaý jáne Ulytaý oblystarynda 8 toptyq sý qubyryn salý jáne rekonstrýktsııalaý jobasy aıaqtaldy. Bul jumystar 208 myńnan astam turǵyny bar 49 eldi mekenniń aýyzsýmen qamtý jaǵdaıyn jaqsartýǵa múmkindik berdi, – dedi Sý resýrstary jáne ırrıgatsııa vıtse-mınıstri Erbolat Ibraıhanov.

Aıta keteıik, sý únemdeý tehnologııalary paıdalanylatyn egis alqabynyń aýmaǵy 86%-ǵa ulǵaıdy.