Sý sharýashylyǵyn reformalaý: iske qosylatyn iri jobalar ataldy
ASTANA. KAZINFORM — 2025 jylǵa 184 mlrd teńge kóleminde 138 jobany iske asyrý josparlanyp otyr. Bul týraly Sý resýrstary jáne ırrıgatsııa mınıstri Nurjan Nurjigitov málim etti.
- Bıyl bıýdjet qarajaty men halyqaralyq qarjy uıymdarynyń (Búkilálemdik, Islam jáne Eýropalyq bankter) qarajaty esebinen 6 myńnan astam shaqyrym kanal (1485 kanal) qaıta jańǵyrtylyp jatyr. Onyń ishinde 2025 jyly eki júz myńǵa jýyq gektar júktelgen aýmaǵymen myń shaqyrymǵa jýyq (962 km) kanal (275 kanal) paıdalanýǵa beriledi. Jalpy alǵanda, 2021–2025 jyldar aralyǵynda shamamen jeti myń shaqyrym ırrıgatsııalyq kanal jańǵyrtylatyn bolady, - dedi N. Nurjigitov Parlament Májilisindegi sý sharýashylyǵy salasyn reformalaý taqyrybyndaǵy Úkimet saǵatynda.
Onyń aıtýynsha, ırrıgatsııalyq kanaldardy jańǵyrtýmen qatar, ózge de mańyzdy gıdrotehnıkalyq qurylys nysandarynda aýqymdy jumystar atqarylyp jatyr.
- Atap aıtqanda, syıymdylyǵy 245 mıllıon tekshe metrdi quraıtyn Aqtóbe sý qoımasy, 120 myń gektar aspaly alańy bar Qyzylorda sý toraby, Shymkent qalasyndaǵy Toǵys sý qoımasy jańǵyrtylyp paıdalanýǵa berildi. Sonymen qatar 6 óńirde – Aqmola, Almaty, Qyzylorda, Soltústik Qazaqstan, Mańǵystaý jáne Ulytaý oblystarynda 200 myńǵa jýyq turǵyny bar 49 eldi mekendi sapaly aýyz sýmen qamtamasyz etýge arnalǵan 8 sý nysanynyń qurylysy aıaqtalyp, paıdalanýǵa berildi. Jalpy alǵanda, byltyr Sý resýrstary jáne ırrıgatsııa mınıstrligi jalpy quny shamamen 600 mlrd teńgeni quraıtyn 137 jobany iske asyrý boıynsha jumystar júrgizdi, - dedi mınıstr.
Onyń sózine qaraǵanda, 2025 jylǵa jalpy somasy 184 mlrd teńgeni (2024 jyldan 67%-ǵa artyq) quraıtyn 138 jobany iske asyrý josparlanyp otyr. Atalǵan jobalardyń 31-i elimizdiń 9 oblysynda – Aqmola, Atyraý, Almaty, Qyzylorda, Túrkistan, Batys Qazaqstan, Soltústik Qazaqstan, Mańǵystaý jáne Ulytaý oblystarynda sýmen jabdyqtaý nysandaryn salý jáne qaıta jańartý baǵyttaryna arnalǵan. Osy maqsattarǵa bıyl 71 mlrd teńge bólindi. Bul jobalardy iske asyrý nátıjesinde halyq sany shamamen 1,3 mln adamdy quraıtyn 468 aýyldyq eldi meken taza aýyzsýmen qamtylyp, 2,5 myń shaqyrymnan astam sý qubyry salynady jáne qaıta jańartylady.
- Іske asyrýǵa josparlanǵan iri ınfraqurylymdyq jobalarǵa toqtalsaq, Túrkistan oblysynda Qaraqýys sý qoımasynyń (1,1 mln m³) qurylysyn aıaqtaý, Jetisý oblysynda Qyzylaǵash sý qoımasyn (42,6 mln m³) rekonstrýktsııalaý, Soltústik Qazaqstan oblysynda «Bıoprýd» sý jınaqtaýyshynyń qorǵanys dambasyn (35 mln m³) salý, Aqmola oblysynda Jabaı ózenińde Balkashıno aýyly mańynda (1,5 mln m³) sý jınaqtaýysh salý, Jambyl oblysynda jalpy kólemi 1,4 mln m³ bolatyn «Andas 1 jáne 2» toǵandarynyń qurylysyn aıaqtaý kózdelip otyr. Sonymen qatar, Jambyl oblysyndaǵy Yntaly, Batys Qazaqstan oblysyndaǵy Kırov jáne Túrkistan oblysyndaǵy Qapshaǵaı sý qoımalaryn rekonstrýktsııalaý jumystary jalǵasyp jatyr. Atalǵan jobalar aıasynda 2025 jyldyń sońyna deıin shamamen 180 mln tekshe metr kóleminde tasqyn jáne erigen sýdy qosymsha jınaýǵa múmkindik beretin sý qoımalaryn paıdalanýǵa berý josparlanyp otyr. Odan basqa 214 jobanyń jobalyq-smetalyq qujattamasy jáne tehnıkalyq-ekonomıkalyq negizdemesi ázirlenedi, - dedi Nurjan Nurjigitov.
Budan buryn habarlanǵandaı, sýarmaly egistikterge sý tarıfterin belgileýdiń jańa ádistemesi ázirlenedi.