Sý resýrstary mınıstri «kran sýyn» ishe me

ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov ortalyqtandyrylǵan, ıaǵnı kran arqyly keletin sýdy ishe me? Bul saýalǵa vedomstvo basshysynyń ózi jaýap berdi.

- Qazir sýdyń sapasy saǵat saıyn tekseriledi. Bul jergilikti atqarýshy organdardyń jaýapkershiligi, sol sııaqty sanıtarııalyq-epıdemıologııalyq qyzmet te óz jospary aıasynda baqylaý ólshemderin júrgizedi. Búginde ortalyqtandyrylǵan júıeden beriletin aýyzsýdy halyq paıdalanyp otyr. Qaı jerde sý ishýge qaýipsiz, qaı jerde ishýge bolmaıdy deý jónsiz. Sebebi ortalyqtandyrylǵan sýmen jabdyqtaý degenimiz, bul sýdy turmystyq maqsatta ishýge bolady degendi bildiredi, - dep jaýap berdi Nurjan Nurjigitov Úkimet otyrysynan keıin ótken baspasóz máslıhatynda.

Sondaı-aq BAQ ókilderi mınıstrden «Kran sýyn ishesiz be?» dep surady.

- Men óńirlerge barǵanda árqashan sýdy ishemin. Maǵan keıde «Qaı óńirde eń dámdi sý?» degen suraq qoıady. Bul suraqqa jaýap berý úshin men únemi sýdy iship kóremin. Biraq qaı óńirdiń sýy dámdi ekenin aıta almaımyn. Áli barlyq óńirdi aralap úlgermedim, - dep tolyqtyrdy vedomstvo basshysy.

Aıta keteıik, 2027 jylǵa deıin sý esepteý júıesin tolyq tsıfrlandyrý josparlanyp otyr. 

Elimizde ulttyq sý resýrstary aqparattyq júıesi ázirlenip jatyr.