Sý resýrstary mınıstri Qazaqstanda eń dámdi sý qaı óńirde ekenin aıtty

ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov Qazaqstannyń qaı óńirindegi sý eń dámdi degen suraqqa jaýap berdi. Bul týraly mınıstr Jambyl oblysynda ótken «Móldir bulaq» ekologııalyq aktsııasy barysynda aıtty.

Mınıstrdiń sózinshe, jumys babymen eldiń barlyq aımaǵyn aralaǵanda ár óńirdiń sýyn iship kórýge tyrysady, alaıda ár adamǵa týǵan jerdiń sýy erekshe bolyp kórinedi.

– Jýrnalıster menen «qaı jerdiń sýy tátti?» dep jıi suraıdy. Biz qyzmet barysynda Qazaqstannyń barlyq óńirine baryp turamyz. Barǵan jerimde mindetti túrde sý ishemin. Biraq qaıda barsań da, týǵan jerdiń sýyna jetpeıdi. Onyń quramynda tek mıneraldar ǵana emes, adamnyń balalyq shaǵy, týǵan elge degen saǵynyshy, týǵan topyraqqa degen qurmeti bar. Qaı óńirdiń sýy bolsa da, ony qadirleý – týǵan jerdi qadirleýmen teń. Sondyqtan árkimge óz aýylynyń sýy baldaı kórinedi, – dedi Nurjan Nurjigitov.

Eske salaıyq, Sý resýrstary jáne ırrıgatsııa mınıstri Jambyl oblysyna «Móldir bulaq» aýqymdy ekologııalyq aktsııasynyń alǵashqy kezeńin bastaý úshin barǵan.

Aktsııa aıasynda elimizdiń ońtústik óńirlerindegi 28 bulaqta tazalaý jumystary júrgizildi. Іs-shara Memleket basshysy Qasym-Jomart Toqaev bastamashylyq etken «Taza Qazaqstan» jalpyulttyq baǵdarlamasy sheńberinde ótti.

Ekologııalyq sharaǵa shamamen 3,8 myń adam qatysty. Bulaq kózderin ashý, qalpyna keltirý, sondaı-aq aınalasyn tazalaý jáne abattandyrý jumystaryna Sý resýrstary jáne ırrıgatsııa mınıstrliginiń mamandary, vedomstvoǵa qarasty uıym qyzmetkerleri, eriktiler men stýdentter jumyldyryldy.

Aıta keteıik, Túrkistan oblysynda ótken «Móldir bulaq» aktsııasyna 1500 adam qatysty.