Sý resýrstary mınıstri Altaı Aınabekpen kezdesýinde ne týraly áńgimelesti

ASTANA. KAZINFORM - QR Sý resýrstary jáne ırrıgatsııa mınıstri - Nurjan Nurjigitov «Jibek Joly» telearnasyndaǵy «ÝÁDE» baǵdarlamasyna suhbat berdi.

Mınıstrdiń aıtýynsha, ol 2023 jyldyń jeltoqsan aıynda bloger Altaı Aınabekpen kezdesip, onyń usynǵan tehnologııasymen tanysqan.

«Birinshiden, aıtylǵan 2 mlrd 600 mln tekshe metr sý — arnaıy gıdroposttardan ótken sý. Sýdy ólsheıtin arnaıy quraldar bar. Biraq sol sýdyń Aralǵa jetýi úshin ony retteý qajet, durys bólý kerek. Sondyqtan bul — naqty derekke negizdelgen kórsetkish» - dedi mınıstr.

Mınıstr kez kelgen jańa tehnologııa nemese ádisteme ǵylymı negizde dáleldenýi tıis ekenin atap ótti.

«Ekinshiden, men ol jigitpen tanyspyn (Altaı Aınabek). 2023 jyldyń jeltoqsan aıynda ol meniń qabyldaýymda boldy. Óz jobasyn tanystyrdy. Sol kezde men oǵan: «Birinshi óz ádisińdi kórset, dálelde», — dep aıttym. Jumystar júrgizilgennen keıin biz: «Endi ǵalymdardy qosaıyq», — dedik. Sebebi áleýmettik jelide «jańbyr jaýyp jatyr, men ony shaqyrdym» dep kez kelgen adam aıta alady. Biraq ony ǵylymı túrde dáleldeý kerek. Sondyqtan biz ınstıtýttyń ǵalymdaryn qosýǵa usynys jasadyq. Ǵalymdar zertteý júrgizsin dedik. Biraq bul jumys iske aspady. Ol qarsy boldy dep aıta almaımyn, biraq birge jumys istelmedi» - dedi mınıstr.

Altaı Aınabek qansha qarjy surady ?

«Aqsha týraly da áńgime boldy. Biraq biz birinshi kezekte ǵylymı dáleldemeni talap ettik. Qazir naqty somany esime túsire almaımyn, biraq áńgime 100-200 mln teńge kólemindegi qarajat týraly boldy» - dedi Nurjan Nurjitov.

Osyǵan deıin biz «Jańbyr adamy» Altaı Aınabek Almatynyń aýasyn qalaı tazartatyny týraly materıal jarııalaǵan edik.