Sý nysandaryna ótý úshin tólem alý zańdy ma

ASTANA.KAZINFORM - Árbir azamat sý aıdyndaryn demalý, serýendeý, shomylý nemese áýesqoı balyq aýlaý úshin erkin paıdalana alady. Bul — onyń ortaq sý paıdalaný quqyǵy jáne ol ár adamǵa týǵannan beriledi. Bul týraly Sý resýrstary jáne ırrıgatsııa mınıstrligi málimdedi.

Eger zańda naqty kórsetilmese, onda qorshaý, shlagbaým nemese «ótýge tyıym salynady» degen belgi qoıyp, azamattardyń jaǵalaýǵa ótýine eshkim kedergi jasaı almaıdy.

Memleket tek erekshe jaǵdaılarda ǵana jaǵalaýǵa kirýdi ýaqytsha shekteýi múmkin. Mysaly, halyq densaýlyǵyn qorǵaý jáne qaýipsizdik maqsatynda, tabıǵatty saqtaý úshin nemese sý az jyldary. Biraq mundaı aqparat mindetti túrde BAQ arqyly, memlekettik organdardyń saıttarynda jarııalanýy tıis jáne jaǵalaýdaǵy arnaıy belgiler arqyly kórsetiledi.

Zań sý qorǵaý aımaqtarynda kúrdeli ǵımarattar men qurylysjaılar salmaı, balalar oıyn jáne sport alańdary, jaǵajaılar, akvaparkter jáne basqa da demalys oryndaryn ornatyp, paıdalanýǵa múmkindik beredi. Kásipker ózine berilgen ýchaskeni qorshaýǵa quqyly, alaıda qorshaý azamattardyń sý aıdynyna erkin ótýin shektemeýi tıis.

Eger sý aıdyny qorshalyp, jaǵalaýǵa ótý múmkin bolmasa, jer paıdalanýshy azamattardyń erkin ótýin qamtamasyz etýge mindetti.

Aqy tek jaǵajaı nemese demalys aımaǵy kórsetetin qyzmet úshin ǵana alynýy múmkin. Al sý jaǵasyna ótý úshin aqy alý – zańsyz. Sý aıdyndarynyń mańynda kólik jýýǵa, janarmaı nemese hımııalyq zattardy saqtaýǵa, sondaı-aq qorshaǵan ortany lastaıtyn kez kelgen áreketke tyıym salynatynyn eske saqtaǵan durys.

Aıta keteıik, Shymkentte sý nysandaryn jekeshelendirý sot arqyly jaramsyz dep tanyldy.

Qazaqstan men Qytaı transshekaralyq sý nysandaryn avtomattandyrýǵa ýaǵdalasty.