Sý nysandaryn jańǵyrtýǵa frantsýz tehnologııalary tartylady
ASTANA. KAZINFORM – Qazaqstan men Frantsııa sý sharýashylyǵy ınfraqurylymyn jańǵyrtý boıynsha pılottyq jobany iske asyrady.
Sý resýrstary jáne ırrıgatsııa mınıstrligi frantsýzdyq CarpiTech Hydroplus kompanııasymen Qazaqstan Respýblıkasynyń gıdrotehnıkalyq ınfraqurylymyna frantsýz tehnologııalaryn engizý jónindegi jobany iske asyrý kezeńderin aıqyndaý týraly kelisimge qol qoıdy.
Qujatqa qol qoıý rásimine Sý resýrstary jáne ırrıgatsııa vıtse-mınıstri Jandos Sálimov qatysty.
Kelisim aıasynda birneshe kezeń kózdelgen. Atap aıtqanda, mınıstrlik aıqyndaǵan gıdrotehnıkalyq qurylystardyń qujattamasyna saraptamalyq taldaý júrgizý, Qazaqstanda ınjenerler men mamandarǵa arnalǵan oqytý semınarlaryn uıymdastyrý, sondaı-aq frantsýz tehnologııalaryn pılottyq negizde engizý úshin keminde eki bóget pen bir sýarý kanalyn aıqyndaý josparlanyp otyr.
Árbir tańdalǵan nysan boıynsha usynymdar, aldyn ala tehnıkalyq sheshimder jáne jumystardy iske asyrý merzimderi ázirlenedi.
Kanaldarǵa geomembranalyq jabyn tóseýdi, gıdrotoraptardy avtomattandyrýdy jáne tsıfrlyq monıtorıng júıesin engizýdi qamtıtyn pılottyq jobalar sý sharýashylyǵy ınfraqurylymynyń qaýipsizdigi men paıdalaný tıimdiligin arttyrýǵa baǵyttalǵan. Bul tájirıbeni keıin Qazaqstandaǵy basqa da gıdrotehnıkalyq nysandardy jańǵyrtý kezinde qoldaný kózdelip otyr.
Aıta keteıik, bıyl maýsym aıynda QR Sý resýrstary jáne ırrıgatsııa mınıstrligi men CarpiTech Hydroplus kompanııasy arasynda tehnıkalyq yntymaqtastyq týraly kelisimge qol qoıylǵan bolatyn.
— Bizdi CarpiTech Hydroplus kompanııasynyń Qazaqstannyń sý sharýashylyǵy nysandarynda óz tehnologııalyq sheshimderin engizý jónindegi usynysy qyzyqtyrdy. Kompanııanyń Jambyl oblysynda óz óndiristik bazasy, ıaǵnı zaýytynyń bolýy da — biz úshin úlken artyqshylyq. Frantsýz delegatsııasymen qol qoıylǵan qujattardy jalpy yntymaqtastyqtan naqty jobalardy iske asyrýǵa kóshýge múmkindik beretin praktıkalyq qural retinde qarastyramyz, — dedi Sý resýrstary jáne ırrıgatsııa vıtse-mınıstri Jandos Sálimov.
Aıta ketelik elimizde sý resýrstaryn basqarý júıesi ózgeretini týraly jazǵan edik.
