Sý mınıstrligi engizgen ózgerister saladaǵy barlyq damý baǵytyn qamtyp otyr — sarapshy
ASTANA. KAZINFORM – «Júıeli ózgeristerdiń negizi qalandy» — halyqaralyq sarapshy Sý resýrstary jáne ırrıgatsııa mınıstrliginiń sý salasyn transformatsııalaý baǵytyndaǵy jumysyn joǵary baǵalady. Bul týraly vedomstvonyń baspasóz qyzmeti málim etti.
Ortalyq Azııanyń Memleketaralyq sý sharýashylyǵyn úılestirý komıssııasynyń ǵylymı-zertteý ortalyǵy dırektory Dınara Zıganshına Qazaqstandaǵy sý sharýashylyǵy salasyn transformatsııalaý baǵytyndaǵy Sý resýrstary jáne ırrıgatsııa mınıstrliginiń jumysyn joǵary baǵalady. Sarapshynyń pikirinshe, vedomstvo bolashaqta salanyń damýyna negiz bolatyn mańyzdy júıeli ózgeristerdiń irgetasyn qalady.
— Mınıstrliktiń qurylýy sýdyń Qazaqstan úshin basym mańyzǵa ıe ekenin kórsetedi. Qazirdiń ózinde aýqymdy ózgerister baıqalyp otyr. Bul — gıdrotehnıkalyq qurylysjaılardy jańǵyrtý baǵdarlamasy, sý resýrstarynyń ulttyq aqparattyq júıesin qurý, tsıfrlyq monıtorıng pen esepke alýdy engizý, kadrlardyń biliktiligin arttyrý men sý salasy qyzmetkerlerin materıaldyq yntalandyrý boıynsha keń kólemdi baǵdarlama. Sondaı-aq transshekaralyq sý qatynastarynyń damýy da oń baǵytta júrip jatyr. Bul — uzaq merzimdi úderis, degenmen bolashaq damýǵa negiz bolatyn mańyzdy júıeli ózgeristerdiń irgetasy qazirdiń ózinde qalandy, — dedi MSShÚK ǵylymı-zertteý ortalyǵynyń dırektory Dınara Zıganshına.
Sarapshynyń aıtýynsha, mınıstrlik engizip jatqan ózgerister sý salasynyń barlyq damý baǵytyn qamtyp otyr.
— Júıeli jáne keshendi jumys júrgizilip jatyr. Buǵan dálel bolatyn mysaldar da jetkilikti. Sonyń ishinde ekologııalyq baǵytty kúsheıtken jańa Sý kodeksiniń qabyldanýy, odan keıin qabyldanǵan ádistemelik usynystar — sonyń aıǵaǵy. Menińshe, mınıstrlik bul baǵytta úılestirýshi retinde mańyzdy ról atqaryp otyr. Jalpy ózgerister barlyq baǵytta júrip jatyr. Eń mańyzdysy — qabyldanyp jatqan sheshimder júıeli ári keshendi, jáne olardyń alǵashqy nátıjeleri qazirdiń ózinde kórine bastady, — dep atap ótti sarapshy.
Eske sala keteıik, buǵan deıin Mınıstrlik qurylǵaly sý zańnamasyn buzý faktilerin anyqtaý kórsetkishi 9 ese óskenin jazǵan edik.