Sý lımıtin buzǵan qyzylordalyq sharýalarǵa 17 mln teńge aıyppul salyndy
QYZYLORDA. KAZINFORM — QR Sý resýrstary jáne ırrıgatsııa mınıstrliginiń bastamasymen sý jetkizip berý qyzmetin tsıfrlandyrý baǵytynda bıyl «Bıllıng» júıesi iske qosyldy. Júıe aıasynda Qyzylorda oblysynyń aýmaǵyndaǵy tutynýshylar túgel elektrondy kelisimshartqa otyrdy.
«Qazsýshar» RMK Qyzylorda fılıalynyń málimetinshe, Aral-Syrdarııa basseındik ınspektsııasy bıylǵy sýarý naýqanynda turaqty sýarý úshin 3,25 mlrd tekshe metr sý paıdalaný lımıtin belgiledi.
— Oblystyq aýyl sharýashylyǵy jáne jer qatynastary basqarmasynyń ındıkatıvti josparyna sáıkes 185,8 myń gektar egis alqabyn ornalastyrý mejelense, onyń 70 myń gektary — kúrish. Indıkatıvti jospar men lımıt negizinde elektrondy júıe arqyly 121,2 myń gektar egis alqaby boıynsha 1053 tutynýshymen kelisimshart jasaldy. Sýarý naýqany bastalǵannan beri Syrdarııa ózeninen 3,29 mlrd tekshe metr sý alyndy. Tutynýshylarǵa 2,49 mlrd tekshe metr sý jetkizildi. Osylaısha lımıt tolyq oryndaldy, — dedi fılıal dırektorynyń orynbasary Aıdos Asanbaev.
Mamandardyń aıtýynsha, Syrdarııa ózeninde sý deńgeıiniń joǵary bolýynan sý tapshylyǵy týyndaǵan joq. Kúrish tolyq sýǵa bastyrylyp bolǵansha sýdyń qara naryǵyndaǵy jaǵdaı da qatań baqylaýda boldy.
— Degenmen, 5 sharýa qojalyǵynyń kelisimsharttan tys 134 gektar jerge kúrish ekkeni anyqtaldy. Qaǵıdaǵa sáıkes eki eselengen aqy tóleý sharasy qabyldandy. Atap aıtqanda, 16,9 mln teńge tóleý mindettelip, onyń 14,6 mln teńgesi nemese 86%-y óndirildi. Búgingi kúni kelesi jylǵy sýarý naýqanyna daıyndyq qyzý. Aıaqtalmaı qalǵan ınvestıtsııalyq jobalar, aǵymdaǵy jóndeý, mehanıkalyq tazartý jumysy jalǵasyp jatyr. Onyń ishinde kanaldar bógelip, keptiriledi. Respýblıkalyq menshiktegi sý sharýashylyǵy nysandarynyń aqaýyn anyqtaý baǵytynda vızýaldy tekserý bastaldy, — dedi Aıdos Asanbaev.
Jalpy elimizde Sý resýrstary jáne ırrıgatsııa mınıstrligi ázirlegen bıllıng júıesi arqyly sharýalarmen sýarý sýyn jetkizý boıynsha 26,5 myńnan astam kelisimshart jasalǵany belgili.
