Sý qubyrynyń jóndelýine baılanysty kókshetaýlyqtarǵa aýyzsý tasymaldanyp jetkizilýde

KÓKShETAÝ. QazAqparat – Kókshetaýdyń «Saryarqa» jáne «Jaılaý» shaǵynaýdandaryndaǵy turǵyndar birneshe kúnnen beri sýdy tasymaldap iship otyr. Al qalanyń ortalyǵyndaǵy turǵyn úılerde sýdyń qysymy tómen. Jýrnalıstermen ótken brıfıngte Kókshetaý qalasy ákiminiń orynbasary Baýyrjan Ernazarov pen «Kókshetaý sý arnasy» kommýnaldyq kásipornynyń bas dırektory Ermek Ómirǵalıev osy máseleni sheshý boıynsha atqarylyp jatqan jumys týraly málimdedi, dep habarlaıdy QazAqparat tilshisi.

Qala ákimi orynbasarynyń aıtýynsha, shtattyq rejımde Kókshetaý qalasynyń sý tutynýy sýmen jabdyqtaýdyń eki kózinen - Shaǵalaly sý qoımasynan (táýliktik sý alý – 15 myń tekshe metr) jáne Kókshetaý toptyq sý qubyrynan (Sergeev sý qoımasynan táýliktik sý alý – 20 myń tekshe metr) júzege asyrylady.

Jalpy, qalaǵa 35 myń tekshe metr sý qajet.

2021 jylǵy 31 tamyzda «Nura toptyq sý qubyry» kommýnaldyq kásiporny óziniń tutynýshylaryn, onyń ishinde «Kókshetaý sý arnasy» kommýnaldyq kásipornyn 6 qyrkúıekte 15 kún merzimge Kókshetaý toptyq sý qubyrynda josparly-profılaktıkalyq jóndeý júrgiziletini týraly hatpen habardar etti.

Osyǵan baılanysty sý berý toqtatylady.

«Kókshetaý qalasynyń turǵyndaryn aýyz sýmen turaqty qamtamasyz etý úshin kelip túsken aqparatty nazarǵa ala otyryp, «Kókshetaý sý arnasy» kommýnaldyq kásiporny qoldanystaǵy rezervýarlarǵa 48 myń tekshe metr sý qoryn qamtamasyz etti. Qabyldanǵan sharalar Kókshetaý toptyq sý qubyrynan sý berýdi 6 qyrkúıekten 10 qyrkúıekke deıin toqtatqan sátten bastap sýdyń turaqty berilýin qamtamasyz etýge múmkindik berdi», - dep túsindirdi B.Ernazarov.

Kókshetaý toptyq sý qubyrynan sý berýdi toqtatqannan keıin 7 qyrkúıekten bastap qazirgi ýaqytqa deıin kásiporyn Shaǵalaly sý qoımasynan sý berý kólemin 15 myń tekshe metrden 26 myń tekshe metrge deıin ulǵaıtty.

«Soltústik jáne shyǵys ónerkásiptik aımaqtarda ornalasqan ónerkásiptik kásiporyndardy sýmen shekteý týraly sheshim qabyldandy. Budan basqa, sorǵy stantsııalary arqyly sý kóleminiń jetpeýine baılanysty kásiporyn «Jaılaý» jáne «Saryarqa» shaǵyn aýdandarynda sýmen jabdyqtaýdy shekteýge májbúr. Bul shaǵyn aýdandarǵa kúnine eki ret sý jetkizý uıymdastyrylǵan», - dep atap ótti qala ákiminiń orynbasary.

Al «Kókshetaý sý arnasy» kommýnaldyq kásipornynyń basshysy E.Ómirǵalıev túsindirgendeı, osyndaı jaǵdaı Krasnoıar aýylynda da qalyptasyp otyr.

«Jalpy, osy shaǵyn aýdandardy qospaǵanda Kókshetaý qalasynda sý bar, tek keshki ýaqytta joǵarǵy qabat turǵyndarynan shaǵym túsedi. Bizdiń tazartý qondyrǵylarymyz bıik jerde tur, sý sorǵy stantsııalaryn iske qospaı-aq qalaǵa aǵynmen jetkiziledi. Biraq «Saryarqa» jáne «Jaılaý» shaǵyn aýdandaryna ekinshi kótermeli sorǵy stantsııalary qyzmet kórsetedi, sondyqtan qıyndyqtar týyndady jáne biz olardy shekteýge sheshim qabyldadyq», - dep túsindirdi E.Ómirǵalıev.