Sý qubyrynyń jarylýyna baılanysty Pavlodar kósheleriniń birin sý basty
PAVLODAR. QazAqparat – Pavlodar kósheleriniń biri sý qubyrynyń buzylýy saldarynan sý astynda qaldy. Kósheniń birneshe bóligindegi qozǵalys toqtatyldy. Kommýnaldyq qyzmetter apatty joıý úshin jıyrma kópqabatty turǵyn úıdi sýmen jabdyqtaý júıesinen ajyratty, dep habarlaıdy QazAqparat Pavlodarnews.kz saıtyna silteme jasap.
Shevchenko kóshesinen Tolstoı kóshesine deıin qozǵalys jabyldy. Qala ákimdiginiń baspasóz qyzmeti habarlaǵandaı, Pavlodarda Kataev kóshesi, 16 mekenjaıy boıynsha qudyqtan sý aǵyp jatqany anyqtaldy. Qazirgi ýaqytta «Pavlodar sý kanaly» JShS apattyq brıgadasy jarylǵan oryndy anyqtaý úshin sýdy sorý jumystaryn júrgizýde.
«Pavlodar qalasynyń ákimdigimen irgeles jatqan turǵyn úılerdiń jertólelerinen sýdy sorý úshin «Kommýnservıs» KMM arnaıy tehnıkasy jumyldyryldy», - delingen qalanyń baspasóz qyzmetiniń habarlamasynda.
Apat saldaryn joıý boıynsha jumystardyń júrgizilýine baılanysty Kataev kóshesi boıymen Shevchenko kóshesinen Tolstoı kóshesine deıin avtomobıl kóliginiń qozǵalysy ýaqytsha toqtatyldy.
