Sý qubyryn senimgerlik basqarýǵa berý múmkindigin qarastyrý qajet – Smaıylov
«Eldi mekenderdi sapaly aýyz sýmen qamtamasyz etý – aldymyzda turǵan eń mańyzdy mindetterdiń biri. 2025 jyldyń sońyna deıin halyqtyń 100 paıyzy taza aýyz sýmen qamtylýy tıis. Bul – áleýmettik mańyzy joǵary másele. Sondyqtan, ákimdikter aýyldar men qalalarda tıisti ınfraqurylymdy tartý jumystaryna erekshe mán berýi tıis. Atalǵan jobalardy qarjylandyrýǵa basymdyq berilý kerek. Qoldanystaǵy jáne jańadan iske qosylatyn nysandardy tıimdi paıdalaný úshin salany avtomattandyrý kerek. ıAǵnı, ınnovatsııalyq tehnologııalardy engizýge erekshe mán bergen durys. Oblys ákimderi sý qubyrlaryn kútip ustap, olardy tıisti mekemelerge senimgerlik basqarýǵa berý múmkindigin qarastyrý qajet», - dedi Úkimet basshysy.
Onyń atap ótýinshe, ákimdikter aýyl ishinde júrgizilip jatqan sý qubyrlary men eldi mekenge deıin tartylatyn toptyq sý qubyrlarynyń josparyn bir-birine sáıkestendirýi tıis.
«Keıbir toptyq sý ótkizgishterdiń qurylysy jyldar boıy aıaqtalmaı jatqany jasyryn emes. Degenmen, qazir jaǵdaı birshama jaqsaryp keledi. Qurylysy uzaqqa sozylǵan 10 jobanyń qazir 7-eýi paıdalanýǵa berildi. Qalǵan 3 joba bıyl iske qosylady. Mundaı problemalardyń oryn alýynyń basty sebebi - negizinen jobalyq qujattamalardyń sapasyz daıyndalýy», - dedi ol.
Premer-Mınıstr sonyń kesirinen joba quny birneshe ese qymbattap ketedi de tapsyrys berýshiler men merdiger kompanııalar arasynda kelispeýshilik oryn alatyndyǵyn basa aıtty.
«Munyń barlyǵy jergilikti bılik tarapynan úılestirý jumystarynyń álsizdiginen. Jańa jobalardy iske asyrý kezinde osy jaıttardyń barlyǵyn eskerip, tapsyrma ýaqytynda oryndalýy qajet. Atalǵan problemalarǵa qaramastan, jalpy, halyqty sýmen qamtamasyz etý jumystary jaqsy qarqynmen júrip jatyr» - dedi Álıhan Smaıylov.