Sý qubyryn qaıta qurý kezinde 6,4 mlrd teńge jymqyrý faktisi boıynsha tergeý aıaqtaldy

ASTANA. KAZINFORM — «Astrahan-Mańǵyshlaq» sý qubyryn qaıta qurý kezinde 6,4 mlrd teńge somasyna memleket qarajatyn jymqyrý faktisi jóninde qylmystyq isti tergep-tekserý aıaqtaldy. 

Bas prokýratýranyń arnaıy prokýrorlary bıýdjettiń atqarylýyn tekserý barysynda prokýrorlar anyqtaǵan «Astrahan-Mańǵyshlaq» sý qubyryn qaıta qurý kezinde 6,4 mlrd teńge somasyna memleket qarajatyn jymqyrý faktisi jóninde qylmystyq isti tergep-tekserýdi aıaqtady.

— «KazTransOıl» AQ-nyń enshiles kompanııasy — «Magıstraldyq Sýaǵyzǵysy» kvazımemlekettik kásipornynyń burynǵy bas dırektory, onyń orynbasary, merdiger kompanııanyń ókilderi jáne jobalaý uıymynyń quryltaıshysy jymqyrý jasaǵan degen kúdikke ilinip otyr, — delingen habarlamada. 

Qylmystyq isti tergep-tekserý sheńberinde kúdiktilerdiń 1,1 mlrd teńge mólsherindegi múlki anyqtalyp, úkimniń oryndalýyn qamtamasyz etý maqsatynda sottyń sanktsııasymen tyıym salynǵan. Qylmystyq is sotqa jiberiledi.   

Aıta ketelik Bas prokýratýra memleketaralyq izdeýde júrgen kúdiktilerge qatysty túsinik bergen edi.