Sý qubyry daýy: ShQO-da sot merdigerden 25 mln-nyń ornyna 134 myń teńge ǵana óndirdi
ÓSKEMEN. KAZINFORM – Shyǵys Qazaqstan oblysynyń Turǵysyn aýylynda sý qubyryn salǵan merdigerden aıypaqyny qosa eseptegende 25 mln teńgeden astam qarajat óndirip alý talap etilgen. Alaıda sot saraptamasynan keıin oryndalmaǵan jumystardyń rastalǵan quny 124 myń teńgege deıin qysqardy.
Daýly másele quny 891,3 mln teńge bolatyn sý qubyry jelilerine qatysty týyndaǵan. Olardy salýǵa arnalǵan kelisimshartty Altaı aýdanynyń turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspektsııasy bólimi merdiger uıymmen 2022 jylǵy mamyrda jasasqan.
Nysan 2023 jylǵy 1 jeltoqsanda paıdalanýǵa berilgen. Alaıda keıin merdigermen esep aıyrysý kezinde birqatar másele týyndaǵan.
ShQO boıynsha ishki memlekettik aýdıt departamenti júrgizgen tekserý barysynda kompanııaǵa is júzinde oryndalmaǵan jumystar úshin 14,75 mln teńge negizsiz tólengen degen qorytyndy jasalǵan.
Osydan keıin tapsyrys berýshi sotqa júgindi. Ol atalǵan somany qaıtarýdy ǵana emes, merdigerden qosymsha 10,6 mln teńge aıypaqyny óndirip alýdy talap etken.
Kompanııa talappen kelispedi. Merdigerdiń túsindirýinshe, somadaǵy aıyrmashylyqtar qurylys jumystary barysynda engizilgen ózgeristerge baılanysty bolǵan. Atap aıtqanda, nysanda transheıasyz tehnologııa qoldanyldy. Jaýapker bul sheshimder tapsyrys berýshimen, avtorlyq jáne tehnıkalyq qadaǵalaý taraptarymen kelisilgenin málim etti. Bul rette jobanyń quny artpaǵan.
Naqty qandaı jumystardyń oryndalǵanyn anyqtaý úshin sot qurylys-tehnıkalyq jáne ekonomıkalyq saraptama taǵaıyndady. Saraptama nátıjesinde mamandar is júzinde oryndalmaǵan jumystardyń qunyn 14,75 mln teńge emes, 124 177 teńge dep baǵalaǵan.
Sonymen qatar jobaǵa engizilgen ózgerister onyń tehnıkalyq-ekonomıkalyq kórsetkishterine áser etpegeni jáne memlekettik saraptamadan qaıta ótýdi talap etpegeni anyqtaldy. Merdiger jabdyqtar men 421 sý eseptegishti tıisti aktiler boıynsha tapsyrys berýshige tapsyrǵan.
Nátıjesinde ShQO mamandandyrylǵan aýdanaralyq ekonomıkalyq soty talap aryzdy ishinara qanaǵattandyrdy. Merdigerden 124 177 teńge óndirildi, al taǵy 14,6 mln teńgeden astam somany óndirý týraly talap qanaǵattandyrylmady.
Aıypaqynyń kólemi de aıtarlyqtaı qysqardy. Talap etilgen 10,6 mln teńgeniń ornyna merdigerden 10 612 teńge óndirildi. Sot tapsyrys berýshiniń aıypaqyny esepteý kezinde kelisimsharttyń qoldanylý merziminen asyp ketken kezeńdi de esepke alǵanyn anyqtaǵan.
Osylaısha bastapqyda málimdelgen talaptardyń nebári 0,84 paıyzy ǵana negizdi dep tanyldy. Soǵan baılanysty sot saraptamasyn júrgizýge jumsalǵan 1,96 mln teńge shyǵyn Altaı aýdanynyń turǵyn úı-kommýnaldyq sharýashylyq bóliminen merdigerdiń paıdasyna óndirildi. Sot sheshimi zańdy kúshine endi.
Eske salsaq, osyǵan deıin SQO-da zańsyz mıkroqarjylyq qyzmetpen aınalysqan turǵyn sottalǵany habarlanǵan.
