Sý kirgen baspanamyzdyń qabyrǵasy úgitilip, qulap jatyr – SQO turǵyny
PETROPAVL. KAZINFORM – Soltústik Qazaqstan oblysynda tasqynnyń beti qaıtyp, qaýipti aýmaqtan kóshirilgenderdiń aldy baspanalaryna kire bastady. Sýda birneshe kún turyp qalǵan úılerdiń jaǵdaıy máz emes, qazirgi ýaqytta tehnıkalyq zertteý júrgizilip, kelgen shyǵyn eseptelip jatyr.
Ǵabıt Músirepov atyndaǵy aýdanda 9 turǵyn úı sýǵa ketti. Onyń bireýi Drýjba eldi mekeninde, qalǵany aýdan ortalyǵy Novoıshımskoe aýylynda.
Tasqynnan zardap shekkenderdiń biri – Gúljaz Qulmanova. Eldi meken turǵyny aýdandyq mádenıet úıinde kórkemdik jetekshi, kúıeýi Janbolat Batyrbaev osy mekemede ádisker bolyp jumys isteıdi. Novoıshımskoe eldi mekenine 2002 jyly Ózbekstannyń Navoı oblysy, Tamdybulaq aýdanynan kóship kelgen eken.
«Eki ulym bar, ekeýi de stýdent. Bul úıde elge qonys aýdarǵannan beri turdyq. 1960 jyly samannan salynǵan úsh bólmeli úı. 2017 jyly óńirde qatty sý tasqyny bolǵanda da sý úıge deıin kelgenimen, kirmep edi.
Sý basatynyn, zattaryńyzdy jınańyz dep aldyn ala aıtty. Aýyldyq ákimdiktiń qyz-jigitteri keldi, tótenshe jaǵdaılar bóliminiń mamandary eskertti. Úıdiń irgetasy bıik, sol sebepti úıge kiredi dep oılaǵan joqpyz. Sondyqtan dúnıe-múliktiń jartysy qaldy, turmystyq tehnıka sýǵa ketti. Alyp shyqqanymyz – kreslo-dıvan, kishkene kórpe-jastyq jáne kıim-keshek, qalǵany bári qaldy. Malymyz joq», - deıdi Gúljaz Qulmanova.
Tasqyn sý aýylǵa 6 sáýir túnde kelip, birer saǵatta bıiktigi 1,5 metrge jetken.
«Úıdiń, terezeniń jartysyna deıin sý kóterildi. Sý eki-úsh kún turdy. Qazir úıdiń ishindegisi ketti, tek jertólede sý tur. Qabyrǵalary úgitilip qulap jatyr. Jóndeý úshin qanshama qarajat kerek. Ári ol úıde tursaq aýrý bolamyz. Másele sheshiledi dep oılaımyn, jergilikti ákimdik úı alyp beremiz dep otyr. Kórshilerimdegi jaǵdaı da máz emes», - deıdi aýyl turǵyny.
Qazir Gúljaz Qulmanova bala-shaǵasymen qaıyn inisiniń úıinde úsh otbasy bolyp turyp jatyr. Tıesili bir jolǵa kómek – 100 AEK mólsherinde járdemaqy alǵan. Ómiri tezirek qalypty jaǵdaıǵa kelse eken degen tilegi bar.
Ǵ.Músirepov atyndaǵy aýdan ákimdiginiń málimetinshe, tasqynnan Novoıshımskoe eldi mekeninde 25 adam zardap shekti. Al Drýjba aýylynda úıi sýda qalǵan eki turǵynǵa jergilikti «Tselınnoe-2004» JShS birden basqa baspana bergen. Sondaı-aq maldaryn qajetti jem-shóppen qamtydy. Qazirgi ýaqytta Novoıshım aýdanyndaǵy ótinish bergen 5 turǵyn 1 846 myń teńge ótemaqy aldy.
11 sáýir aýdanda tabıǵı sıpattaǵy tótenshe jaǵdaıda zardap shekkenderge keltirilgen materıaldyq shyǵynnyń mólsherin baǵalaıtyn komıssııa quryldy. Qazirgi ýaqytta sýda qalǵan úılerge, dúnıe-múlikke tehnıkalyq zertteý júrgizilip jatyr.
Sondaı-aq aýyldyq okrýgterde senbilikter uıymdastyryp, sý tasqyny ákelgen qoqysty jınap, joıý josparlanǵan.
