Sý qoımasyn salý qymbat, biraq halyqtyń qaýipsizdigi úshin kerek – Mınıstr

ASTANA. KAZINFORM – QR Tótenshe jaǵdaılar mınıstri Shyńǵys Árinov Úkimet otyrysynda sý tasqyny qaýpin birjola sheshýge bolatyn usynymdardy aıtty.

«Kóksaraı sýrettigishiniń qurylysy Syrdarııa ózenindegi 400-den astam eldi mekendi sý basý qaýpin birjola joıýǵa múmkindik berdi. Bıyl Esil ózeninde Aqmola jáne Soltústik Qazaqstan oblystarynyń eldi mekenderin sý basý qaýpin boldyrmaıtyn Esil sý rettegishin salý josparlanýda», - dedi mınıstr Úkimettiń búgingi otyrysynda. 

Mınıstr respýblıka boıynsha 40 sý qoımasyn salý qajet ekenin aıtýda. 

«Iá, bul ákimdikter úshin qymbat bolady, biraq bul halyqtyń qaýipsizdigin arttyrýǵa jáne olardyń múlkin joǵaltýdan týyndaıtyn áleýmettik shıelenisti azaıtýǵa múmkindik beredi. Oǵan qosa, jaz mezgilinde aýyl sharýashylyǵy alqaptaryn sýarý máselelerin sheshedi», - dep túsindirdi spıker. 

Álemdik praktıka kórsetip otyrǵandaı, joıý sharalaryna bólinetin qarajat somasy tótenshe jaǵdaılardy eskertý úshin aldyn ala paıdalanýǵa bolatyn qarajattan júzdegen ese kóp.

«Úkimettiń qańtardaǵy otyrysynda tıisti baǵdarlamalyq qujattarda sý tasqynyna qarsy sharalardy josparlaý boıynsha jergilikti atqarýshy organdarǵa tapsyrma berildi. Óz kezeginde biz úılestirýshi mınıstrlik retinde halyqty qorǵaý jaýapkershiliginen qashpaımyz. Bizdiń tarapymyzdan tótenshe jaǵdaılar týyndaǵanda barlyq qajetti kómek kórsetiledi», - dep ýáde berdi mınıstr. 

Buǵan deıin Shyńǵys Árinov Úkimet otyrysynda sý tasqyny jaǵdaıyna qandaı tehnıkalar ázirlengenin jáne qandaı jospar qurylǵanyn baıandady.