Sý qoımalary men kanaldardy jańǵyrtýǵa 475 mln teńge bólindi - Qyzylorda oblysy
QYZYLORDA.QazAqparat - Bıyl oblys eldi mekenderin sýlandyrý maqsatynda 8 sorǵy qondyrǵysy satyp alynady, dep habarlady QazAqparat HAA tilshisi.
Sondaı-aq, Aral aýdany Qaratereń aýyldyq okrýgindegi «Baıan» kanaly men Bógen aýyldyq okrýgindegi «Kókish» kanalynyń jobalyq-smetalyq qujattaryn ázirleýge, sonymen qatar, sý qorǵaý aımaqtary men beldeýlerin belgileý jobalaryn ázirleýge 475,3 mln teńge bólinip, qazirgi tańda memlekettik satyp alý jumystary júrgizilýde.
Qazaly qalasyndaǵy «Gorsovet» jáne «Dáýletaryq», Jalaǵash aýdany Buqarbaı batyr aýyldyq okrýgindegi «Alpamys», Shıeli kentindegi «Baısary», Qyzylorda qalasyndaǵy Qyzyljarma jáne Jibek joly kanaldaryn, Jańaqorǵan aýdanyndaǵy Qyrash jáne Kóltoǵan sý qoımalaryndaǵy gıdrometrıkalyq beketterdi kútip ustap turý da osy qarjy esebinen júzege asyrylady.
Sonymen qatar, Shıeli aýdanyndaǵy Kúmisketken ýchaskesinde sý qoımasyn salý jobasynyń tehnıkalyq-ekonomıkalyq negizdemesin ázirleý jumystaryna oblystyq bıýdjetten 31,4 mln teńge bólinip, tıisti jumystar júrgizilýde.
