Sý qoımalaryndaǵy sý kólemi 85 paıyzǵa jetti
ASTANA.KAZINFORM – 2025 jylǵy 2 maýsymdaǵy jaǵdaı boıynsha Almaty jáne Jetisý oblystaryndaǵy iri sý qoımalaryna 18,8 mlrd tekshe metr sý jınaldy. Bul kórsetkish olardyń jobalyq syıymdylyǵynyń 85 paıyzyna teń. Bul týraly QR SRIM Sý únemdeý tehnologııalaryn damytý departamentiniń dırektory Berikbol Shatabaıuly Mándibaev málimdedi.
Mınıstrlik dereginshe, bıylǵy 1 sáýirdegi kórsetkishke sáıkes, elimizdiń ońtústik óńirlerindegi sý qoımalarynda 26 mlrd tekshe metr sý jınaqtalǵan. Al Jambyl oblysynda, sonyń ishinde Kırov sý qoımasyn qosqanda 1 mlrd 245 mln tekshe metr sý jınalyp, bul jalpy syıymdylyqtyń 82 paıyzyn qurady.
Sý tapshylyǵy táýekelderin azaıtý maqsatynda Shý-Talas sý sharýashylyǵy jónindegi komıssııanyń 35-otyrysynda 2025 jylǵy vegetatsııalyq kezeńge arnalǵan sý bólý kestesi bekitildi.
- Bıylǵy vegetatsııalyq kezeńde Qazaqstanǵa keletin sý kólemi mynadaı bolyp otyr: Shý ózeni boıynsha – 180 mln tekshe metr, Talas ózeni boıynsha – 400 mln tekshe metr sý keledi dep kútilip otyr,- dedi maman.
Sondaı-aq ol óz sózinde, 2025 jylǵy 1 sáýirde Shardara sý qoımasyna 10,9 mlrd tekshe metr sý kelýi josparlanǵan bolatyn. Alaıda naqty túsken sý kólemi 12,6 mlrd tekshe metrdi qurap, boljamnan 1,7 mlrd tekshe metrge artyq boldy.
Resmı aqparat boıynsha, vegetatsııalyq kezeńde Shardara sý qoımasyna 3,7 mlrd tekshe metr sý kelýi kózdelgen. Onyń ishinde sáýir aıynda – 1 mlrd tekshe metr, mamyrda – 134 mln tekshe metr sý túsken.
Osyǵan baılanysty Shardara sý qoımasyna turaqty sý kelýin qamtamasyz etý maqsatynda mınıstrlik Naryn jáne Syrdarııa sý qoımalary boıynsha memleketaralyq sý sharýashylyǵyn úılestirý komıssııasy aıasynda kórshiles memlekettermen birlesip jumys júrgizip jatyr.
- Qazaqstan, Ózbekstan jáne Tájikstan arasynda «Bahrı Tochık» sý qoımasynan maýsym–tamyz aılary aralyǵynda jiberiletin sý boıynsha úshjaqty keste bekitildi. Qujat aıasynda vegetatsııalyq kezeńde Dostyq kanaly arqyly keminde 491 mln tekshe metr sý jetkizý josparlanyp otyr, - dedi Almas Darhanuly.
Eske sala keteıik, Sý resýrstary mınıstrligi Soltústik Araldy saqtaýdyń II kezeńine kiriskeni jaıly jazǵanbyz.