Sý qoımalaryndaǵy ahýal qandaı
ASTANA. KAZINFORM – Batys Qazaqstan oblysyndaǵy «Qazsýshar» ókildigi Jaıyq-Kóshim júıesinen Qamys-Samara kólderine sý jiberip jatyr. Atalǵan kólder júıesine 20 jylda alǵash ret sý bosatylyp otyrǵanyn atap ótken jón.
El prezıdentiniń tapsyrmasy boıynsha Sý resýrstary jáne ırrıgatsııa mınıstrligi 2030 jylǵa deıin sý sharýashylyǵy qurylystaryn rekonstrýktsııalaýdyń keshendi josparyn ázirlegen. Bul týraly Ortalyq kommýnıkatsııalar qyzmetinde ótken brıfıngte QR Sý resýrstary jáne ırrıgatsııa mınıstrliginiń resmı ókili Móldir Ábdýalıeva aıtty.
Josparda jańadan 57 sý qoımasyn salý qarastyrylǵan. 20-sy sý resýrstaryn basqarýdy damytý tujyrymdamasynda da kózdelgen. Atap aıtqanda, Aqtóbe oblysynda 4 sý qoımasy, Túrkistan jáne Jambyl oblystarynda 3 sý qoımasy, Batys Qazaqstan, Shyǵys Qazaqstan jáne Qaraǵandy oblystarynda 2 sý qoımasy, Aqmola, Almaty, Qyzylorda oblystarynda jáne Abaı oblystarynda 1 sý qoımasyn salynbaq.
Sondaı-aq vedomstvonyń resmı ókili qazirgi ýaqyttaǵy elimizdiń sý qoımalaryndaǵy jaǵdaı týraly baıandady.
«Aqmola oblysynda Astana jáne Sileti sý qoımalary 100%-ǵa toly. Eki nysan da shtattyq kestege saı jumys istep tur. Soltústik Qazaqstan oblysyndaǵy 2 iri sý qoımasy da 100%-ǵa toly, óńirde sý tasqyny jalǵasýda. Sergeev sý qoımasy bógetiniń jotasynan asyp ketken sýdyń bıiktigi 2,6 metrge teń. Búginde Petropavl qalasynyń shegindegi Esil ózeniniń deńgeıi - 1355 sm, bul kórsetkish ótken táýlikpen salystyrǵanda ózgergen joq. Aımaqta kúrdeli jaǵdaı saqtalady», – dedi spıker.
Barlyq sý qoımasynda táýlik boıy kezekshilik jalǵasýda, saǵat saıyn sý sharýashylyǵy jaǵdaıyna monıtorıng júrgiziledi.
