Sý qoımalarynda 15 mlrd tekshe metr oryn bar
ASTANA. KAZINFORM – Eldegi sý qoımalarynda jalpy kólemi 15 mıllıard tekshe metr bos oryn bar. Bul kólem tasqyn kezinde kútiletin sý kólemin ustap qala alady.
Bul týraly búgin BAQ ókilderine arnalǵan brıfıngte Sý resýrstaryn retteý, qorǵaý jáne paıdalaný komıtetiniń tóraǵasy Erlan Jumabaev málimdedi.
Jalpy elde irili-usaqty 400-ge jýyq sý qoımasy bar. Onyń ishinde 90-y respýblıkalyq mańyzǵa ıe. Spıkerdiń sózinshe, sý qoımalarynyń tehnıkalyq jaǵdaıy qanaǵattanarlyq deńgeıde jáne olar turaqty túrde tekseristen ótkizilip turady.
Qazirgi tańda óńirler boıynsha sý qoımalarynyń tolý deńgeıi árkelki. Soltústik aımaqta bul kórsetkish 68 paıyzdy, Ortalyq óńirlerde 67 paıyzdy quraıdy.
Al batys oblystarda sý deńgeıi 61 paıyz bolsa, Shyǵysta 81 paıyzǵa jetken.
Mamandardyń aıtýynsha, sý tasqyny qarsańynda ózenderdegi sý deńgeıi turaqty baqylaýda. Ásirese, kórshi memlekettermen shektesetin Jaıyq pen Tobyl ózenderiniń jaǵdaıy jiti qadaǵalanyp otyr.
– Búginnen bastap Jaıyq ózenine Reseı aýmaǵyndaǵy Irıklınskoe sý qoımasynan jiberiletin sý kólemi 60 tekshe metrge deıin qysqartyldy. Buǵan deıin bul kórsetkish 139 tekshe metr bolǵan. Atalǵan sheshim Reseı Federatsııasymen birlese qabyldandy. Sondaı-aq Tobyl ózenine keletin sý kólemi de tómendeıdi. Bul is memleketaralyq deńgeıde birlesken komıssııa baqylaýymen júrip jatyr, – dedi basqarma basshysy.
Aıta keteıik, aldaǵy jyldary Túrkistan oblysynda tórt jańa sý qoımasy salynady.