Sý qoımalary men ózender kóktemgi sý tasqynyna daıyn ba – Mınıstrlik jaýaby
Sý resýrstary jáne ırrıgatsııa mınıstrligi Qazaqstannyń sý qoımalary men ózenderi kóktemgi sý tasqynyna daıyn ba degen suraqqa jaýap berdi, dep habarlaıdy Kazinform.
«2023 jyly ońtústik aımaqtarda vegetatsııa óte qurǵaq boldy. Sý tapshylyǵy baıqaldy. Elimizdiń ońtústigindegi barlyq derlik sý qoımalary paıdasyz kólemge deıin jumys istedi. Qazgıdromettiń kúzgi-qysqy boljamy boıynsha barlyq sý qoımalarymyz toltyrý rejıminde jumys isteýde. Qazirgi ýaqytta olar 60-70%-ǵa toldy. Bizdiń sý qoımalarymyz aǵyndy retteý úshin sý kólemin qabyldaýǵa daıyn», - dedi mınıstrliktiń Sý sharýashylyǵy komıteti tóraǵasynyń orynbasary Gúlmıra Imasheva Sputnik Qazaqstan mýltımedııalyq baspasóz ortalyǵynda ótken dóńgelek ústelde.
Mysal retinde spıker tranzıttik rejımde jumys isteıtin Tasótkel sý qoımasyn aıtty. Onyń qazirgi kólemi – 301 mıllıon tekshe metr.
«Kelip jatqan barlyq sý tómengi aǵysqa tógiledi. Osylaısha, biz tasqyn sýdy qabyldaýǵa daıyndalyp jatyrmyz», - dedi spıker.
Eń iri sý qoımalarynyń biri Shardaradaǵy sý kólemi búginde 2,5 tekshe shaqyrymdy quraıdy. Ótken jyldyń dál osy kúni kólem 4,1 tekshe shaqyrym bolǵan edi.
«Sý tasqyny – tabıǵı protsess. Munyń bári aýa raıynyń qandaı bolatynyna baılanysty. Biraq mınıstrlik pen aýmaqtyq bólimsheler tarapynan kúndelikti monıtorıng júrgiziledi. Biz sýdyń kólemi men aǵynyn baqylap otyrmyz. Barlyq iri sý qoımalarynda vegetatsııalyq kezeńge arnalǵan jumys kestesi ázirlendi, onda biz 1 sáýirge, vegetatsııalyq kezeńniń bastalýyna qaraı qajetti kólemdi jınaıtynymyz jazylǵan», - dep tolyqtyrdy Gúlmıra Imasheva.
