Sý qorshaýynda qalǵan aýylǵa jol ashyldy - TJK
NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker tasqyn sý qorshaýynda qalǵan aýyldyń jaǵdaıy týraly aıtyp berdi, dep xabarlaıdy QazAqparat tilshisi.
«Keshe, 14 sáýir kúni tas joldan Eski Kolýton aýylyna baratyn jol ýchaskesi jóndeldi. Búginde avtokólik qozǵalysy ashyldy. Al Kolýton ózeniniń deńgeıi tómendep keledi», - dedi V.Bekker elordada ótken baspasóz máslıxatynda.
Aıta keteıik, ótken aptanyń basynda komıtet basshysy Astraxan aýdany boıynsha birneshe aýylda jaǵdaıdyń kúrdeli ekenin jetkizgen bolatyn. TJK baspasóz qyzmetinen habarlaǵandaı, 7 sáýir kúni Astrahan aýdanyndaǵy Kolýton ózeninde sý deńgeıiniń kóterilýine baılanysty Eski Kolýton aýylyndaǵy 20 aýlany sý alyp ketken. Aýyl turǵyndary avtokólik baılanysynan da qol úzip qaldy.
Joldy basqan sýdyń deńgeıi 60-70 santımetr bolǵan. Al uzyndyǵy 700 metrge deıin bardy. Demalysqa qaraı 40 metrge deıin qysqardy. Sol kezde jergilikti atqarýshy organdar arnaıy tehnıkany daıyndap, jol jóndeý jumystaryn bastaǵan bolatyn. «Joldyń shetki jaqtaryn da sý shaıyp ketti. Sondyqtan, ol jerge de topyraqty úıetin bolady. Sý deńgeıi túskennen keıin joldyń qalǵan bóligi jóndeledi. Sóıtip, Eski Kolýton aýlyna baratyn jol da ashylady. Bul jumystar shamamen 4 kún ishinde jasalady», - degen edi V.Bekker. Eski Kolýtonda 240 úı bar. Barlyǵy 715 adam turady.
