Sý qaýipsizdigi: Qazaqstan jahandyq sý basqarý júıesin jetildirýdi usyndy
ASTANA. KAZINFORM – Qazaqstan Respýblıkasynyń Syrtqy ister mınıstrligi sý resýrstary salasyndaǵy kópjaqty yntymaqtastyqty nyǵaıtý máselelerin, onyń ishinde Qazaqstan Respýblıkasynyń Prezıdenti Qasym-Jomart Toqaevtyń Halyqaralyq sý uıymyn qurý jónindegi bastamasyn talqylaýǵa arnalǵan arnaıy is-shara uıymdastyrdy.
QR Syrtqy ister mınıstrligi baspasóz qyzmetiniń habarlaýynsha, is-shara Ulan-Batyr qalasynda ótip jatqan BUU-nyń Shóleıttenýge qarsy kúres jónindegi konventsııasy Taraptarynyń 17-konferentsııasy (COP17) aıasynda ótti. Talqylaýǵa BUU, ulttyq delegatsııalardyń, sarapshylar qaýymdastyǵynyń jáne úkimettik emes uıymdardyń ókilderi qatysty.
Negizgi nazar jerdiń tozýy, qurǵaqshylyq, azyq-túlik qaýipsizdigi jáne bıoalýantúrliliktiń saqtalýy jaǵdaıyndaǵy sý resýrstaryn basqarý máselelerine aýdaryldy.
Qazaqstan Respýblıkasynyń Mońǵolııadaǵy Elshisi Almas Seıtaqynov Memleket basshysynyń bastamasy halyqaralyq sý yntymaqtastyǵyn nyǵaıtý jáne Qazaqstan, Mońǵolııa men Ortalyq Azııa óńiri tap bolyp otyrǵan uzaq merzimdi ekologııalyq problemalardy sheshý turǵysynan mańyzdy ekenin atap ótti. Osy rette sý salasyndaǵy óńirlik ózara is-qımyl tetikterin jetildirý perspektıvalary da talqylandy.
Qazaqstandyq delegatsııa Halyqaralyq sý uıymyn qurýdyń tujyrymdamalyq tásilderin jáne Astana, Naırobı men Nıý-Iork qalalarynda ótkizilgen halyqaralyq konsýltatsııalardyń qorytyndylaryn tanystyrdy. Qazaqstan tarapy múddeli memleketter men uıymdardy sý resýrstaryn jahandyq basqarý júıesin odan ári jetildirý máselelerin, onyń ishinde Abý-Dabıde ótetin aldaǵy BUU-nyń Sý resýrstary jónindegi konferentsııasy aıasynda talqylaýǵa shaqyrdy.
Qatysýshylar BUU-daǵy qazirgi reformalar jáne sý qaýipsizdigi salasyndaǵy syn-qaterlerdiń artýy jaǵdaıynda Qazaqstan bastamasynyń ózektiligin atap ótti. Mońǵolııa Sý agenttiginiń tóraǵasy Zeneıamadaryn Batbaıar Qazaqstan bastamasynyń ýaqtyly kóterilgenin atap ótip, ekologııalyq jáne klımattyq syn-qaterlerdiń jahandyq sý problematıkasymen ózara baılanysyna nazar aýdardy.
Іs-shara qorytyndysy boıynsha qatysýshylar BUU alańdarynda sý kún tártibin birlesip ilgeriletýge jáne osy saladaǵy kópjaqty yntymaqtastyqty nyǵaıtýǵa múddelilik bildirdi.
Osyǵan deıin OA elderi Syrdarııa basseıninde sý esebin avtomattandyrý josparynyń jobasyn ázirleıtini týraly jazdyq.
