Sý eseptegishterdiń kórsetkishin telefonmen nemese elektrondy poshta arqyly habarlaýǵa bolady
ASTANA. 30 qańtar. QazAqparat - Salqyn jáne ystyq sýmen qamtamasyz etý qurylǵylarynyń esepteý kórsetkishterin kóparnaly aqparat ortalyǵyna telefonmen 707-444 biryńǵaı qalalyq nómirine habarlasyp aıtýǵa bolady.
Bul týraly «Astana-ERTs» JShS málim etti.
Elordanyń resmı saıtynyń jazýynsha, esepteý qurylǵylarynyń kórsetkishteri atalǵan telefon boıynsha aı saıyn 10-nan 31-ine deıin 09-00-den 21-00-ge deıin úzilissiz, demalyssyz qabyldanady. Qalǵan kúnderi Ortalyq dúısenbiden jumaǵa deıin 09-00-den 21-00-ge deıin jumys isteıdi.
Eske salaıyq, call-center ótken jyldyń sáýir aıynan bastap jumys isteı bastady. Demalys kúnderin qosyp eseptegende olar kún saıyn 2000 qońyraýǵa deıin qabyldaıdy. «Kóbine telefon qońyraýlary aıdyń 20-31 kúnderi aralyǵynda túsedi. Osyǵan baılanysty bul kúnderi call-center telefonyna tústen keıin nemese keshte qońyraý shalǵan durys», - deıdi mamandar.
Sonymen qatar, salqyn jáne ystyq sýmen qamtamasyz etý qurylǵylarynyń esepteý kórsetkishteri týraly aqparatty: aerc.kz@mail.ru. meken-jaıy boıynsha elektrondy poshtamen jiberýge bolady.
