Sý dobynan Álem Kýbogy: Qazaqstandyq vaterpolshylar alǵashqy jeńisine qol jetkizdi

Bul joly otandastarymyz Chernogorııa qurama komandasymen kezdesken bolatyn. Oıyn qazaqstandyqtar úshin ońaıǵa soqqan joq. Degenmen, Sergeı Drozdovtyń shákirtteri alǵashqy kezeńde aıqyn basymdylyq tanytyp, alǵa shyqty. Esep 3:2.

Biraq, kelesi kezeńde otandastarymyz kóptegen qatelikterge boı aldyryp qarsylastarǵa ese jiberip aldy. Esep 1:4. Úshinshi kezeń teńbe-teń ótti. Esep 1:1. Tórtinshi sheshýshi kezeńde oıyn asa shıelenisti jaǵdaıda ótti. Alǵashqy mınýttarda eki komanda bir-bir doptan soǵyp jalpy esepti 5:7-ge jetikzdi. Osyndaı qıyn-qystaý sátte qazaqstandyq vaterpolshylar qorǵanysta myqta oınaı bilip, qarymta shabýyldarda Murat Shákenov pen Sergeı Gýbarevtiń kómegimen esepti teńestirdi. Jankúıerlerdiń jan aıamaı qoldaýynyń arqasynda oıynnyń aıaqtalýyna 2 sekýnd qalǵanda Rústem Úkimanov dopty qaqpaǵa toǵytty. Qorytyndy esep: 9:8

«Biz osy jeńistiń arqasynda aldaǵy jyly Tatarstannyń astanasy Qazan qalasynda ótetin Álem birinshiligine qatysatyn boldyq. Men búgin jigitterge rızamyn. Oıynnyń orta kezeńinde komanda qarsylastarǵa ese jiberip alǵanymen, keıin jınalyp, jigerlerin janyp jeńiske jetti», - dedi sý dobynan Qazaqstannyń erler qurama komandasynyń bas jattyqtyrýshysy Sergeı Drozdov.

Búgin otandastarymyz ádettegideı Ortalyq júzý basseıninde kúndiz 12:30 mınýtta 5-oryn úshin Avstralııa qurama komandasymen kezdesedi. Toptyq kezeńde bul komandadan jigitterimiz 8:11 esebimen jeńilip qalǵan bolatyn.

Osydan keıin AQSh jáne Horvatııa komandalary 3-4 oryndardy sarapqa salsa, saǵat 15:10 mınýtta birinshi oryn úshin Vengrııa men Serbııa qurama komandalary kezdesedi.

Esterińizge sala keteıik, Almatyda 19 tamyzdan beri sý doby boıynsha Álem Kýbogy oıyndary júrgizilýde. Oǵan álemdegi eń myqty degen segiz komanda qatysýda. Olar: Qazaqstan, Avstralııa, AQSh, Vengrııa, Serbııa, Chernogorııa jáne Ońtústik Afrıka komandalary.