Sý doby: Qazaqstandyqtar Azııa chempıonatynyń júldegeri atandy
ORAL. QazAqparat – Batysqazaqstandyq qos sportshy Úndistannyń Bangalor qalasynda sý dobynan jasóspirimder arasynda Azııa chempıonatynyń kúmis júldegeri atandy, dep habarlaıdy QazAqparat tilshisi.
Quramynda oraldyqtar Ulan Amangeldıev pen Danııl Artıýh bar qazaqstandyqtar ekinshi orynǵa ıe bolýmen birge álem chempıonatyna joldama aldy.
El quramasy birinshilik barysynda Irandy 9:6, Ózbekstandy 10:9, Qytaıdy 13:7, Koreıany 16:10, Úndistandy 19:6, Shrı-Lankany 27:1 esebimen utty. Tek 8:16 esebimen Japonııa quramasyna ǵana ese jiberdi.
Chempıonat qorytyndysynda japondar chempıon atansa, ırandyqtar úzdik úshtikke ilikti.
Batysqazaqstandyq sý doby sheberleriniń mundaı bıikten kórinýine bapkerleri Nurlan Merǵalıev, Meıirman Muqanǵalıev, Damır Tóregeldıevter kóp eńbek sińirdi.
On jeti jasar Ulan Amangeldıevtiń aıtýynsha, sý dobymen alty jyldan beri dendep aınalysyp keledi.
«Jeńiske qurama músheleriniń bári de óz úlesterin qosty. Birge shabýylǵa shyǵyp, qorǵana da bildik. Eń bastysy, kúmis júldemen birge álem chempıonatyna beriletin joldamany da utyp aldyq. Endi elge oralǵaly jatyrmyz. Aıtýly dodaǵa Danııl ekeýmizdiń qatysýymyz Oralda sý dobynyń jaqsy damyp kele jatqanyn kórsetedi. Aldaǵy ýaqytta da namysty qoldan bermeýge tyrysamyz», - dedi QazAqparat tilshisine U.Amangeldıev.
