Sý doby: Qazaqstan qyzdary álem chempıonatynda Ispanııadan jeńildi
NUR-SULTAN. QazAqparat - Ońtústik Koreıanyń Kvandjý qalasynda ótip jatqan sý dobynan álem chempıonatynda elimizdiń qyzdar quramasy ekinshi kezdesýinde Ispanııadan jeńilip qaldy, dep habarlaıdy QazAqparat tilshisi.
Ispanııa - sý dobynan álemdegi úzdik quramalardyń biri. Olar 2013 jyly chempıondyq tuǵyrǵa kóterilse, 2017 jyly kúmis júldeger atandy. Qazaqstan qyzdary ıspandarmen kezdesýde 6:18 esebimen jeńilip qaldy. Bizdiń qurama synǵa túsetin S tobyndaǵy taǵy bir kezdesýde Grekııa Kýbany 20:4 esebimen tize búktirdi.
Esterińizge sala ketelik, bizdiń qyzdar 14 shildede Kýbadan 9:6 esebimen basym túsken bolatyn. Endi olar 18 shildede Grekııamen sheberlik baıqasady. Atalmysh kezdesýde jeńiske jetken qurama óz tobynda ekinshi oryn alady. Nátıjesinde jarysty jalǵastyrý múmkindigine qol jetkizedi.
Qazaqstandyq qyzdar álem chempıonatyna altynshy márte qatysyp jatyr. Olar 2001 jyly segizinshi oryn aldy. Búgingi kúnge deıin odan joǵary jetistikke jetken joq.
Qazaqstan erler quramasy 15 shildede AQSh-tan 7:16 esebimen jeńilip qaldy. Endi olar 17 shildede Avstralııamen kezdesedi.
Aıta ketsek, 12 shildede Ońtústik Koreıanyń Kvandjý qalasynda sý sporty túrlerinen álem chempıonaty bastaldy. Dúbirli doda 28 shildege deıin sozylady. Álem chempıonatynda sýǵa sekirý, haı-daıvıng, ashyq sý aıdynyndaǵy sýǵa júzý, sýǵa júzý, sınhrondy júzý, sý dobynan jarystar ótkiziledi.
