Sý doby: Qazaqstan áıelder quramasy Azııa chempıony atandy
ASTANA. QazAqparat - Cıngapýrde ótip jatqan sý dobynan Azııa birinshiliginde Qazaqstan áıelder quramasy bir týr buryn chempıon atandy, dep habarlaıdy QazAqparat tilshisi.
Qazaqstandyq sportshylar qatarynan bes kezdesýde jeńiske jetti. Toptyq kezeńde quramalar árbir qarsylasymen eki oıyn ótkizdi. Nátıjesinde olar Sıngapýrdy 12:7, 13:2, Taılandty 16:10, 13:8 esebimen jeńdi. Sondaı-aq olar Ózbekstandy 11:9 esebimen jeńse, taǵy bir kezdesýi erteń, 27 naýryzda ótkizýi kerek edi. Alaıda qazaqstandyq sportshylar 15 upaı jınap, bas júlde taǵdyryn buryn sheship qoıdy.
Ekinshi jáne úshinshi orynda turǵan Ózbekstan men Taılandtyń enshisinde alty upaıdan bar. Olar altynshy týrda jeńiske jetkenimen qazaqstandyq quramany qýyp jete almaıdy.
Al elimizdiń erler quramasy búgin jartylaı fınalda Qytaıǵa 1:10 esebimen jol berdi.
Endi olar 27 naýryzda qola júldege Taılandpen kúsh synasady.
Qazaqstandyq sportshylar toptyq kezeńde Fılıppındi 19:6, Gonkongty 22:7 esebimen jeńse, Iranǵa 14:15 esebimen ese jiberdi. Al shırek fınalda Sıngapýrdy 10:7 esebimen tize búktirgen edi.
